نئی دلی ۔16فروری (اے پی پی):معروف بھارتی موسیقار بپی لہری انتقال کر ڳئن۔بپی لہری دی عمر 69 سال ہئی او گزریل ھک مہینے توں ہسپتال اچ داخل ہن ،انہاں کوں ݙوجھے صحت دے مسئلے دے نال سلیپ اپنیا (رات کوں سمدے ویلھے ساہ بند تھیوݨ دی بیماری) وی لاحق ہئی۔ بپی لہری 1980 اتے 1990 دے ݙھاکے اچ بھارتی فلم انڈسٹری اچ ڈسکو ڈانسر،کوئی اتھاں نچے نچے تے پیار بنا چین کتھاں جیہے گاݨےتوں ڈسکو موسیقی کوں متعارف کروایا اتے رواج ݙتا۔انہاں کوں سونے دے بارے ہار تے انگوٹھیاں تے دھپ دی شوخ عینکاں پاوݨ دی وجہ توں وی شہرت حاصل ہئی ۔اُنہاں دا اصل نام آلوکیش لہری ہئی لیکن انھاں فلم کیتے آپݨا ناں بپی لہری چݨیا تے ایں توں مشہور تھئے ، آپݨے والدین دے نقش قدم تے چلدے ہوئیں ، بپی لہری ترائے سال دی عمر اچ طبلہ وڄاوݨ شروع کیتا تاں جو آپݨے فلمی کیریئر اچ انہاں زیادہ تر پارٹی ڈانس موسیقی ترتیب ݙتی۔آسکر انعام توں سرفراز معروف موسیقار اے آر رحمان بپی لہری کوں یاد کریندے ہوئیں انہاں کوں ہندی سینما دا ’ڈسکو کنگ‘آکھیے ۔
