اقوام متحدہ۔3مارچ (اے پی پی):اقوام متحدہ دے عالمی ادارہ صحت چتاوݨی ݙتی اے جو زیادہ دیر تئیں اُچی آواز اچ موسیقی سڑݨ، شور شرابے دی وجہ توں پوری دنیا اچ 12 توں 35 سال دی عمر دے ھک ارب لوکاں دی سݨیڄ دی صلاحیت ونڄݨ دا خطرہ اے۔ عالمی ادارہ صحت اے چتاوݨی خمیس کوں عالمی یوم ِقوت سماعت تے قوت سماعت ونڄیجݨ دے ودھدے خطرے پاروں نویں بین الاقوامی حفاظتی ہدایات جاری کریندے ہوئیں کیتی اے۔ ایں واری قوت سماعت داجڳ ݙیھاڑ ’’’پوری زندگی کیتے سݨݨ کیتے ، توجہ نال سݨݨ ‘‘دے تھیم نال منایا ڳئے ایں سلسلے وچ مختلف تقاریب اچ محفوظ سماعت کیتے نویں بین الاقوامی معیارات جاری کیتے ڳئن جنہاں دا نفاذانہاں ساریاں جاہواں تے سرگرمیاں تے تھیندے جتھاں اچی آواز اچ میوزک لاتا ویندے ۔ عالمی ادارہ صحت موجب عالمی سطح تے 1.5 بلین توں ودھ لوکاں دی قوت سماعت متاثر اے یا او ایندے توں محروم ہن ، اڄوکے تخمینیں دے مطابق اے تعداد 2030 تئیں ودھ تے 2.5 بلین توں ودھ تھی سڳدی اے ۔ ادارے دے مطابق ڈبلیو ایچ او دا اندازہ اے جو صحت عامہ دے اقدامات تے عملدرآمد کر تے سماعت ونڄݨ دے 50فیصد ضیان کوں روکیا ونڄ سڳدے ۔
