مظفرگڑھ۔9مارچ (اے پی پی): صدارتی ایوارڈ یافتہ صوفی لوک گلوکار استاد پٹھاݨے خان کوں اڄ مداحواں توں وچھڑیے 22 سال تھی ڳئن ، ورھیݨاں اڄ عقدیت واحترام دے نال منایا ویند پئے ،استاد پٹھاݨے خان دے صاحبزادے محمد اقبال پٹھاݨے خان ایں موقع تے میڈیا نال ڳالھ مہاڑ کریندے ہوئیں ݙسائے جو انہاں دا 22واں ورھیݨے دے موقع تے اڄ سویلے گھر اچ قرآن خوانی اتے خیرات دا اہتمام کیتا ڳئے جیں اچ گھر آللیں دے نال مداحواں تے عقیدت منداں وی بھاری تعداد اچ شرکت کیتی تے شام کوں انہاں کوں خراج عقیدت پیش کرݨ کیتے عارفانہ کلام دی ھک محفل دا اہتمام وی کیتا ڳیا جیں اچ صوفی بزرگ صوفی شعرا بابا بلھے شاہ،خواجہ غلام فرید،شاہ حسین،سائیں محمد بخش تے ٻئیں دا کلام پیش کیتا ڳئے ،استاد پٹھاݨے خان دا اصل ناں غلام محمد اتے پٹھاݨے خان انہاں دی عرفیت ہئی،او مظفرگڑھ دی تحصیل کوٹ ادو دے علاقے سنانواں دی ھک وستی تمبو والا اچ 1926 اچ ڄمیے تے ٻلپݨ اچ ہی آپݨے والد خمیسہ خان دے نال کوٹ ادو شہر دے وارڈ نمبر 13 اچ رہائش پزیر تھئے ،انہاں موسیقی دی ابتدائی تعلیم حافظ نزر حسین توں ڳھدی ،1974 اچ ریڈیو ملتان توں پہلی واری ریکارڈنگ کرائی،انہاں خواجہ غلام فرید دا کلام “میݙا عشق وی توں میڈا یار وی توں”ڳا تے عالمگیر شہرت حاصل کیتی،انہاں ٻہوں سارے ایوارڈ ڳھدے ،1979 اچ انہاں دی خدمات دے اعتراف اچ انہاں کوں صدارتی ایوارڈ توں نوازیا ڳیا ، انہاں فرانس،انگلینڈ انڈیا سودھے ٻہوں سارے ملکاں اچ آپݨے فن دا جادو جڳایا تے موسیقی دے شائقین توں بے تحاشہ داد وصول کیتی ،انہاں آپݨے فن توں ایں خطے کوں سنڄاݨ بخشی،مظفرگڑھ ضلع دے تھل دے ٹٻیں اچ اڄ وی انہاں دی سر آلی آواز گونجدی پئی اے، انہاں 9 مارچ 2000 اچ 74 سال دی عمر اچ انتقال کیتا مگر اپݨے فن دی صورت اچ مداحواں دے دلاں اچ ہمیشہ زندہ رہسن ۔
