اسلام آباد۔17مارچ(اے پی پی)وفاقی وزیر اطلاعات و نشریات چوہدری فواد حسین آکھیے جو ڈاکواں دے ٹولے دی سانڄھی حکومت ٻݨاوݨ دی ڳالھ تھیندی پئی اے، پاکستان دا مستقبل چوراں کوں نسے ݙے سڳدے، سندھ ہائوس اچ لوکاں دے ضمیر وکݨ کیتے ٻولیاں لڳدیاں پن، جتھاں ٻہوں سارا پیسہ منتقل تھیوݨ دی اطلاعات ہین، 10 لکھ لوکاں دی کال دے ݙر توں اپوزیشن ݙری ہوئی اے۔ جناح کنونشن سنٹر اسلام آباد اچ گرین یوتھ موومنٹ دی تقریب نال خطاب کریندے آکھی۔ انہاں آکھیا جو کل “چھوٹا ڈان” تحریک انصاف توں بغیر قومی حکومت دی ڳالھ کریندا پیا ہا، عقل دے اندھے آہدن جو ڈاکو اتے چوراں دی حکومت ٻݨا ݙیو،، پہلے اینڄھا بیانیہ کݙاھیں نئیں سݨیا۔ انہاں آکھیا جو اساں اپݨے ملک دا مستقبل کیویں انہاں دے ہتھ ݙے ݙیوں؟ ڄیڑھے سندھ ہائوس اچ ٻے ضمیراں دیاں منڈیاں لائی ٻیٹھن، کیا عوام ایندی اجازت ݙیسن؟ وفاقی وزیر اطلاعات آکھیا جو اپوزیشن ݙاہ لکھ بندے کٹھے تھیوݨ دی ڳالھ توں ݙر ڳئی اے، جلسے جلوس سیاسی و جمہوری حق اے، اساں ملکی تاریخ دا سب توں وݙا کٹھ اسلام آباد اچ کر ݙکھیسوں جو اساں پر تشدد نئیں پر امن لوک ہیں، عمران خان پاکستان دے نوجواناں دے مستقبل دی امید ہین اتے اساں ایں امید دے نال جیسوں اتے مرسوں۔
