مظفرگڑھ۔18مارچ (اے پی پی):رورل ہیلتھ سنٹر ہسپتال دی اپ گریڈیشن، وزیر مملکت ڈاکٹر میاں شبیر علی قریشی افتتاح کیتا۔تحریک انصاف دے مرکزی رہنما اتے وزیر مملکت ہاؤسنگ ڈاکٹر میاں شبیر علی قریشی رورل ہیلتھ سنٹر ہسپتال دائرہ دین پناہ دی 90 ملین روپے دی لاڳت توں تحصیل ہیڈکوارٹر ہسپتال لیول دی اپ گریڈیشن دے منصوبہ دا افتتاح کیتا۔انہاں افتتاحی تقریب توں خطاب کریندے ہوئیں آکھیے جو وزیراعظم عمران خان دی قیادت اچ عوام نال کیتے ڳئے وعدیں دی تکمیل چھیکڑی مرحلے اچ اے ۔گزریل دور اچ صرف کوڑے وعدے کیتے ویندے رہیے کہیں سیاسی جماعت کہیں حکومت اتے کہیں سیاستدان عوام دی تکالیف مکاوݨ تے انہاں کوں ریلیف ݙیوݨ کیتے کجھ نی کیتا ، انہاں آکھیے جو تحصیل کوٹ ادو اتے دائرہ دین پناہ دی باشعور عوام ݙیکھدی پئی اے جو گزریل 30 سالاں اچ پہلی واری صرف عمران خان دی قیادت اچ تحریک انصاف دی حکومت عوام نال کیتے ڳئے وعدے پورے کریندی پئی اے ۔
