راولپنڈی ۔19مارچ (اے پی پی) وزیراعظم عمران خان آکھیا جو عوام دا پیسہ چوری کر تے اراکین دے ضمیر ڳھدے ویندے پئن، 27 مارچ کوں عوام دا سمندر اسلام آباد اچ امر بالمعروف دا سنیھا ݙیسی، اگلے ترائے ہفتے اچ نالہ لئی دا منصوبہ شروع کریسوں۔ ضمیر ویچݨ آلیاں دے خلاف قوم دی کاوڑ ݙیکھ تے لڳدے جو وفاداریاں بدلݨ آلے اراکین اکثریت عوامی دباؤ دا سامھا نہ کر سڳسی اتے واپس آویسی۔ اگلے ترائے ہفتے اچ نالہ لئی دا منڈھ بدھیسوں۔ ایندے نیڑے ماڈل شہر ٻݨیسوں، وݙے شہراں دی رنگ روڈز ویلھے دی لوڑھ اے تانجو شہر کوں کھنݙݨ توں روکیا ونڄے۔ راولپنڈٰی رنگ روڈ منصوبے نال روزگار دے موقع پیدا تھیسن۔ تجارتی سرگرمیاں ودھسن۔ او ہفتے کوں راولپنڈی رنگ روڈمنصوبے دا منڈھ بدھݨ دی تقریب توں خطاب کریندے پئے ہن۔ اے مںصوبہ 38 کلومیٹر توں ودھ چھی رویہ اے جیڑھا ݙو سالیں اچ پورا تھیسی۔ ایں رنگ روڈ تے کئی انٹر چینج وی ٻݨسن۔ ایں نال راولپنڈی اسلام آباد دے جاڑے شہراں اچ ٹریفک دا دباؤ ڳھٹ کرݨ اچ مدد ملسی۔ تقریب توں وزیر داخلہ شیخ رشید احمد،وزیر ہوابازی غلام سرور خان وی خطاب کیتا۔ وزیر اعظم منصوبے دے سنگ بنیاد تے وزیر اعلی پنجاب،وفاقی وصوبائی وزراءکوں مبارخ ݙیندیں ہوئیں آکھیا جو اے منصوبہ ایں سارے علاقے کوں بدل ݙیسی، ہک علاقے اچ مواصلاتی رابطے ودھݨ نال ہر چیز اچ عوام کیتے سوکھ پیدا تھیسی۔ فیصل آباد، سیالکوٹ سودھے وݙے شہراں اچ ایجھی رنگ روڈز دی فزیبیلٹی ٻݨیندے پیوں۔ انہاں شہراں کوں رنگ روڈ دی لوڑھ اے۔ راولپنڈی اسلام آباد دی انتظامیہ کوں ماسٹر پلان ٻݨاوݨ دی ہدایت کیتی اے۔ لاہور اچ راوی اربن ڈویلپمنٹ اتھارٹی اتے سینٹرل بزنس ڈسٹرکٹ ٻݨیندے پیوں، ایں نال کئی ہزار ارب دا سرمایہ حاصل تھیسی۔ ٻہوں کثیر المنزلہ عمارتاں ہوسن۔ راوی سٹی دا مقصد بغیر منصوبہ بندی لاہور شہر دا پھیلاؤ روکݨ اے۔ انہاں اڄوکی ملکی صورتحال بارے آکھیا جو پاکستان دے لوکاں دے سامھے پیسے دی سیاست نال ضمیر ڳھنݨ دی سیاست کھل تے سامھے آئی اے۔ اے چوری دا یا سندھ حکومت دا پیسہ اے۔ اے غیر قانونی طورتے آندا ڳئے اتے ایں نال کھلے عام لوکاں دے ضمیر ڳھدے ویندے پئن۔ سندھ توں پولیس سݙوا تے ایں عمل کوں تحفظ ݙتا ویندا پئے۔ انہاں آکھیا جو اگر تحریک انصاف دے اساݙے منتخب لوکاں اساں توں تنگ ہن تاں انہاں کوں لُکاوݨ دی کیا لوڑھ ہئی۔ پیسہ خرچ تے سیاست اچ آوݨ آلیاں کوں پیسہ دے زور تے ضمیر ڳھنݨ تے کوئی شرم کائنی۔ کیا اے جمہوریت اے۔ مغرب اچ پیسہ ڳھن تے فلور کراسنگ دا تصور وی کائنی۔ ایں موقع تے وزیراعلی پنجاب عثمان بزدار خطاب کریندیں ہوئیں آکھیا جو راولپنڈی رنگ روڈ دا منصوبہ ݙو سالیں اچ پورا تھیسی، کلومیٹر اے شاہراہ 6 رویہ ہوسی۔ انہاں آکھیا جو سیالکوٹ اتے ملتان سودھے ٻئے وݙے شہراں اچ رنگ روڈز ٻݨاوݨ کیتے سٹڈی جاری اے۔ پنجاب اچ ایں واری ریکارڈ ترقیاتی کم تھیندے پئن ایں اچ رکاوٹ پاوݨ آلے ناکام تھیسن۔
