اسلام آباد۔20مارچ (اے پی پی) پاکستان اتےکینیڈین کمپنی بیرک گولڈ وچال ریکوڈک اچ سونے اتے تانبے دی کان کنی تے معاہدہ تھی ڳئے، معاہدے دے تحت ریکوڈک اچ 50 فیصدحصہ بیرک گولڈ دا ہوسی، پنجوی فیصد بلوچستان دی حکومت دا اے جڈانجو اوجی ڈی سی ایل، پاکستان پیٹرولیم لمیٹڈ(پی پی ایل) اتےگورنمنٹ ہولڈنگزپرائیوٹ لمیٹد دا25 فیصدحصہ ہوسی۔ بلوچستان دی حکومت داحصہ وفاقی حکومت ادا کریسی۔ ، بیرک گولڈ اتے شراکت دار کمپنیاں ݙاہ ارب ڈالر توں ودھ سرمایہ کاری کریسن جئیں نال بلوچستان اچ ملازمتاں دے اٹھ ہزار موقع پیدا تھیسن۔ وفاقی وزیرخزانہ ومحصولات شوکت ترین اتوار کوں اتھاں وزیرتوانائی حماداظہراتےوزیراعلیٰ بلوچستان عبدالقدوس بزنجودے رلے سانجھی پریس کانفرنس کریندیں ہوئیں آکھیا جو 2011 اچ عدالت عظمیٰ ریکوڈک معاہدہ ختم کر ݙتا ہئی اتے اے معاملہ بین الاقوامی ثالثی عدالت اچ ڳیاپیا، انٹرنیشنل کورٹ آف آربیٹریشن ، پاکستان تےتقریباً6.4 ارب ڈالرداجرمانہ لاتا، ایندےنال لندن کورٹ آف آربیٹریشن اچ وی پاکستان دے خلاف ساݙھے چار ارب ڈالر دا جرمانہ لڳݨا ہئی۔ وزیرخزانہ آکھیا جو وزیراعظم عمران خان ، 2019 اچ جارحانہ انداز اچ اے معاملہ حل کرݨ کیتے کوششاں شروع کیتی۔
