درگئی ۔20مارچ (اے پی پی) وزیراعظم عمران خان آکھیا جو تحریک انصاف دے ٻھجے ہوئے ارکان آپݨی جماعت اچ واپسی آونڄن تاں انہاں کوں معاف کر ݙیسوں۔ اگر او آپݨے فیصلے تے رہیے تاں آپݨا مستقبل تباہ کر ݙیسن۔ عوام انہاں کوں معاف نہ کریسی۔ کرپشن نال پیسے نال ضمیر گھنݨ آلے ترائیں غلاماں کوں ݙساوݨ چاہنداں جو عدم اعتماد تحریک اچ اساں جتسوں۔ قوم فیصلہ کرے جو حق تے باطل دے معرکے اچ اوں کئیں دے نال تھیوݨے، عوام دا پیسہ چوری کر تے حکومت بچاوݨ توں بہتر اے جو حکومت ونڄے پئی۔ اساں اقوام متحدہ اچ 15 مارچ کوں اسلاموفوبیا دے خلاف ݙینھ مناوݨ دی قرارداد دی منطوری نال مسلم امہ دا کیس جتیے، جنگ ہار تے معاشرہ کھڑا تھی ویندے پر اخلاقی تباہی نال ختم تھیندے۔ اتوار کوں درگئی اچ جلسہ عام توں خطاب کریندیں ہوئیں وزیراعظم آکھیا جو جنید اکبر کوں پنجوی سال تحریک انصاف دی نظریاتی جدوجہد اتے محنت تے خراج تحسین پیش کرینداں، بلدیاتی انتخاب اچ درگئی دے باشعور لوک پاکستان نال تھیسن، انہاں آکھیا جو قوماں دی زندگی اچ کݙاہیں فیصلہ کن ویلھا امدے جو انہاں دے سامھے ݙو رستے امدن، ہک پاسے ملک دے نامور ݙاکو کھڑے تھی ڳئن اتے ݙوجھے پاسوں او لوک ہن جنہاں پنجوی سال انہاں دے خلاف جدوجہد کیتی اے۔ انہاں ݙاکواں چوری کر تے پیسہ نال اساݙے ایم این ایز دے ضمیر دی قیمت لاتی اے، انہاں کوں ڳھنݨ دی کوشش کریندے پئن، ضمیر ویچݨ آلے پیسے ڳھن تے آپݨا ملک، دین اتے ضمیر دا سودا کریندے۔ ملک دی عدالتاں، الیکشن کمیشن اتے ملک دا نینگر ݙیکھدا پئے، اڄ کل سوشل میڈیا دا دور اے، نینگر باشور اے، ساری قوم دے سامھے ضمیر دا سودا تھیندا پئے اتے اینکوں جمہوریت دا ناں ݙتا ویندے۔ اساں جمہوریت دا نظام برطانیہ توں ڳھدے، اتھاں کݙاہیں کوئی رکن ضمیر دا سودا نی کریندا، او مسلمان نی پر انہاں دے اقدار بلند ہن۔ اللہ اساکوں امربالمعروف و نہی عن المنکر دا حکم ݙتے، اگر معاشرے کوں بچاوݨے تاں نیکی نال کھرے تھیوݨے، انہوں مسلم لیگ (ن) آلیاں کوں مخاطب کر تے آکھیا جو تساں ݙو واری زرداری کوں جیل اچ پاتے، جعلی اکاؤنٹس تے مقدمے ٻݨائے، پیپلز پارٹی نواز شریف دے خلاف کیسز ٻݨائے، انہاں چوراں ہک ݙوجھے دے خلاف کیس ٻݨائے، زرداری دا پیٹ پھاڑ تے چوری دے پیسے شہباز شریف کݙھݨے ہن، فضل الرحمان کوں ڈیزل دا خطاب ہک کرپٹ ن لیگی ݙتا ہئی۔ وزیراعظم آکھیا جیڑھے ایم این ایز کوں کروڑاں روپے ݙے تے ڳھنݨ دی کوشش کریندے پئن پارٹی سربراہ باپ وانڳوں ہوندے، ہݨ چھانگا مانگا دے ݙینھ ڳئے، ہݨ لوکاں اچ شعور آڳئے، ٻال ٻال تساں توں واقف اے، انہاں کوں پتہ اے جو تساں پیسے ڳھن تے وفاداریاں بدلدے پیوں۔ جیڑھا وی اساݙے خلاف ووٹ پیسی او پیسے ڳھن تے ووٹ پیسی۔ تساݙے ناں نال ہمیشہ ضمیر فروش لکھیا ویسی۔ تساݙا سماجی بائیکاٹ تھیسی۔ عوام تساں کوں معاف کائنا کریسن۔ انہاں آکھیا جو پاکستان امریکہ دی جنگ اچ شرکت کیتی اتےاسی ہزار ڈالر توں ودھ پاکستانی شہید تھیے، سو ارب ڈالر توں ودھ دا معاشی ضیان تھیا، قبائلی علاقے تباہ تھیے۔ وزیراعظم آکھیا جو اساں امن اچ امریکا دے نال ہوسوں پر جنگ اچ کائنا۔
