چین، افغانستان اتے پاکستان کوں سیاست، ترقی اتے سلامتی دے شعبیں اچ سہ فریقی تعاون کوں ودھاوݨا چاہیدے ، چینی وزیر خارجہ دا وزراء خارجہ اجلاس توں خطاب

بیجنگ۔31مارچ (اے پی پی):چینی وزیر خارجہ آکھیے جو موجودہ حالات اچ چین، افغانستان اتے پاکستان کوں سیاست، ترقی اتے سلامتی دے شعبیں اچ سہ فریقی تعاون کوں ودھاوݨا چاہیدے ۔چینی خبر رساں ادارے موجب اے ڳالھ انہاں صوبہ انہوئی اچ چین ،افغانستان اتے پاکستان دے وزرا خارجہ اجلاس اچ آکھی ۔ انہاں ترائے فریقاں تے زور ݙتے جو او سہ فریقی سیاسی باہمی اعتماد پیدا کرن، ھک ݙوجھے دے بنیادی تحفظات دی حمایت کرن اتے مشترکہ مفادات دا تحفظ کرن۔ ترائی ملکاں کوں عملی تعاون کوں مضبوط کرݨا چاہیدے ، چین پاکستان اقتصادی راہداری دی افغانستان تئیں توسیع کوں فروغ ݙیوݨا چاہیدے تے افغانستان کوں علاقائی سانجھے رابطے اچ حصہ گھنِݨ اچ مدد ݙیوݨی چاہیدی اے ۔ چینی وزیر خارجہ آکھیے جو چین، افغانستان اتے پاکستان انسداد دہشت گردی ، دہشت گردی دے ٹھکاݨے کوں ختم کرݨ تے خطے اچ طویل مدتی استحکام دے حصول کیتے تعاون ودھاوݨا چاہیدے ، ایں موقع تے پاکستانی وزیر خارجہ شاہ محمود قریشی آکھیے جو پاکستان افغانستان دے دنیا دے نال رابطے کوں مضبوط کرݨ دی حمایت کریندے تے پاکستان پاکستان افغان عوام دی زندگیاں کوں بہتر بݨاوݨ کیتے افغانستان دی مدد جاری رکھیسی ۔ انہاں زور ݙتے جو افغانستان دے منجمد اثاثے فوری طور تے واپس کیتے ونڄݨے چاہیدن ۔