لاہور۔1اپریل (اے پی پی):پاکستان تے آسٹریلیا دی کرکٹ ٹیماں وچال ترائے ون ڈے انٹرنیشنل میچاں تے مشتمل سیریز دا فیصلہ کن میچ کل( ہفتے کوں ) قذافی سٹیڈیم لاہور اچ کھیݙیا ویسی ۔ میچ ڈے، نائٹ ہوسی تے پاکستانی ویلھے دے مطابق ݙینھ 3 وڄے شروع تھیسی۔ ݙوہیں ٹیماں وچال میچاں دی سیریز 1-1 توں برابر اے۔ کینگروز پہلے میچ اچ گرین شرٹس کوں 88 رنز توں ہرائے ، پاکستان ٹیم ݙوجھے میچ اچ حساب برابر کریندے ہوئیں آسٹریلوی ٹیم کوں 6 وکٹاں توں ہرا ݙتا۔ ݙوہیں ٹیماں دے درمیان فیصلہ کن میچ کل ہفتے کوں کھیݙیا ویسی ، ݙوہیں ٹیماں دے کپتاناں کامیابی کیتے بیانات ݙتن تے تریجھے تے چھیکڑی میچ اچ کانٹے دار مقابلے دی توقع کیتی ویندی پئی اے ۔ قومی ٹیم مایہ ناز بیٹر بابر اعظم دی زیرقیادت میدان اچ لہسی جݙاں جو آسٹریلوی ٹیم کوں ایرن فنچ لیڈ کریسن ۔ ݙوہیں ٹیماں دے درمیان سیریز اچ شامل ھک ٹی 20 انٹرنیشنل میچ 5 اپریل کوں کھیݙیا ویسی سارے میچز قذافی سٹیڈیم لاہور اچ کھیݙے ویسن۔
