اسلام آباد۔1 اپریل(اے پی پی)پاکستان تحریک انصاف اپݨے ہارس ٹریڈنگ کرݨ آلے اراکین قومی اسمبلی دے خلاف فیصلہ کن کارروائی شروع کر ݙتی اے، پارٹی دے چیئرمین و وزیراعظم عمران خان ارکان قومی اسمبلی نوٹس دے ولدے اچ جواب نامعقول قرار ݙے تے مسترد کرݙتن۔ عمران خان منحرف اراکین قومی اسمبلی دے خلاف ریفرنسز دائر کرݨ دی باضابطہ منظوری ݙتی اے۔ وزیراعظم دے مشیر برائے پارلیمانی امور ڈاکٹر بابر اعوان اتے مرکزی ایڈیشنل سیکرٹری جنرل تحریک انصاف عامر محمود کیانی ہک ملاقات اچ منحرف اراکین دے خلاف آرٹیکل 63-اے(ون) دے تحت ریفرنسز تیار کیتن ڄݙاں جو انہاں اراکین دے خلاف دستاویزی ثبوت وی سپیکر کوں ٻھڄوائے ویسن۔ مشیر پارلیمانی امور ڈاکٹر بابر اعوان آکھیے جو دستور اراکین پارلیمان تے صداقت و امانت دی بنیادی شرط لیندے، ارکان پارلیمانی پارٹی دے سربراہ دی ہدایات تے کھلا انحراف کیتے، ضمیر فروشی اور ہارس ٹریڈنگ ڄھیں سنگین دستوری جرم کرݨ آلے اراکین صادق و امین نئیں رہے۔
