راولپنڈی۔14اپریل(اے پی پی)پاک فوج دے شعبہ تعلقات عامہ (آئی ایس پی آر) دے ڈائریکٹر جنرل میجر جنرل بابر افتخار آکھیے جو پاک فوج ملکی سلامتی و دفاع کیتے ہر ویلھے تیار اے، پاک فوج دے خلاف کوئی سازش برداشت نہ کیتی ویسی، پاکستان دا مستقبل جمہوریت ہی اے، فوج کوں سیاسی معاملات توں انڄھ رکھیا ونڄے، ان شاءاللہ پاکستان اچ کݙاھیں وی مارشل لاء نہ آسی، آرمی چیف مدت اچ توسیع چاہندن نا ڳھنسن۔ پریس بریفنگ اچ انہاں آکھیے جو ݙو ݙینھ پہلے فارمیشن کمانڈرز کانفرنس ملکی سلامتی سانڳے اقدامات بالخصوص اندرونی سکیورٹی و آئین و قانون دی بالادستی تے مکمل اعتماد کیتے، اے اتفاق اے جو جمہوریت اتے اداریاں دی مضبوطی، قانون دی بالادستی اتے سارے اداریاں دا آئین دے دائرہ کار اچ رہݨ ملکی مفاد اچ اے، پاکستان دی سرحدی صورتحال مستحکم اے، دہشت گردی دے خلاف جنگ جاری رہسی، دہشگردی واقعات اتے مختلف کارروائیاں اچ 128دہشت گرد ماریے گین ڄݙاں جو 270 دہشت گرد گرفتار تھین، 97 افسراں و جوان شہید تھین۔ میجر جنرل بابر افتخار آکھیا جو تعمیری تنقید مناسب اے، بے بنیاد کردار کشی قابل قبول نئیں، پاک فوج دے خلاف منظم مہم عوام اتے فوج اچ ونݙ پیدا کرݨ دی کوشش اے ڄیہڑھی کامیاب نہ تھیسی۔ انہاں آکھیا جو پاک فوج مراسلے تے اپݨا موقف قومی سلامتی کمیٹی اچ ݙے ݙتا ہا، کوعی وی پاکستان دو میل اکھ نال نئیں ݙیکھ سڳدا، اعلامیے اچ سازش دا لفظ کائنی، ایکوں اندرونی معاملات اچ مداخلت اتے غیر سفارتی رویہ قرار ݙتا ڳئے، 9 اپریل دی رات وزیراعظم ہاؤس اچ آرمی چیف اتے ڈی جی آئی ایس آئی دی عمران خان نال کوئی ملاقات نئیں تھئی، اے بالکل کوڑ اے، ایندے تے بی بی سی واہیات اسٹوری شائع کیتی اے، اے مکمل من گھڑت اسٹوری ہئی، عمران خان کوں اسٹیبلشمنٹ کوئی آپشن نئیں ݙتا ٻھل وزیراعظم دے آکھیے تے سیاسی قیادت اچ تریاکل سانڳے اڳو تے ودھیے ٻھل اپوزیشن اسمبلیاں تحلیل کرݨ دے آپشن تے نئیں آئے اتے عدم اعتماد دا رستہ چݨیے۔ ڈی جی آئی ایس پی آر آکھیے جو ساݙا سیاست نال کوئی لاھݨا ݙیوݨا نئیں، کہیں ضمنی انتخاب یا بلدیاتی انتخاب اچ کوئی مداخلت نئیں تھئی، جیکر ثبوت ہین توں ڳھن آون، پروپیگنڈا کرݨ آلیآن دے خلاف متعلقہ ادارے کارروائی کریندے پن۔
