اسلام آباد ۔ 18 مئی (اے پی پی) انٹرنیشنل ٹینس پاکستان اچ بحال تھیونڑ دے بعد پاکستان ٹینس فیڈریشن فیصلہ کیتا ہے جو ملک اچ ٹینس دے کھنڈاﺅ اتے چنگائی سانگے انٹرنیشنل کوالیفکیشن دے مزید 6 امپائرز اتے ریفریز تیار کیتے ویسن۔ پاکستان ٹینس فیڈریشن دے سیکرٹری محمد خالد رحمانی اے پی پی کوں ڈسایا جو فیڈریشن ملک اچ باصلاحیت کوچز اتے ریفریز کوں تلاش کرنڑ سانگے سال اچ ڈو دفعہ کورس منعقد کراونڑ دا فیصلہ کیتا ہے جیں دے تحت پہلا کورس اجوکے سال اگست اچ منعقد تھیسی جڈاں جو ڈوجھا کورس سال دے چھیکڑ تئیں تھیسی ۔پہلے ترائے ڈینھ کورس اچ پورے ملک توں 20ریفریز کوں سڈیا گیا ہے انہاں آکھیا جو فیڈریشن امپائرز اتے ریفریز کوں کورس کراونڑ دا فیصلہ ایں سانگے کیتا گیا ہے کیوں جو اساں ڈے انہاں دی تعداد بہوں گھٹ ہے ۔
