اسلام آباد۔5 مئی(اے پی پی)وفاقی وزیر اطلاعات و نشریات مریم اورنگزیب آکھیے جو حکومت سابق وزیراعظم عمران خان دے “بیرونی سازش” بیانیے دا ڈراپ سین کڑݨ کیتے ہک غیرتجانبدار اتے شفاف انکوائری کمیشن ٻݨآوݨ دا فیصلہ کیتے جیندا سربراہ اینڄھا شخص ہوسی جیندے تے کوئی وی انگل نا چا سڳسی، کمیشن دے ٹٖی او آرز کابینہ دے آندے اجلاس اچ فائنل کیتے ویسن، عمران خان دی ساریاں الزام تراشیاں “بیرون ملک سازش” دا نئیں گوگی بچاوݨ کیتے ہین، ڄݙاں انہاں دے اتحادی انہاں کوں چھؤر کے ٻھڄ ڳین تاں اے ساش دا پٹݨا پٹݨ لڳ ڳین۔ اسلام آباد اچ پریس کانفرنس کریندے انہاں آکھیا جو عمران خان دے سازشی ٹولے قومی خزانے اتے توشہ خانہ کوں بے دردی نال لٹیے، کارٹلز اتے مافیاز دے فائدہ کیتے عوام کؤں مہانگ دی چکی اچ سٹیے، ملکی منصوبے سست کیتن، سی پیک دا رستہ روکیے، خارجہ پالیسی ویچ تے دوست ملکاں کؤں ناراض کیتے، انہاں کوں اپݨیاں نااہلیاں دا حساب ݙیوݨا پوسی۔ انہاں آکھیا جو اڄوکی حکومت آندی ہی ایں کوشش اچ اے جو معاشی تباہی، معاشی دہشت گردی اتے معاشی بارودی سرنگاں کوں صاف کرے جو ایندا ٻھار عوام تے نہ پووے، وزیراعظم شہباز شریف پاکستان دے عوام کوں ریلیف ݙیوݨ اچ لڳے ہوئن۔ انہاں آکھیا جو کوئی بیرون ملک سازش نئیں تھئی، اے صرف ڈھونگ اے انکوائری کمیشن بے نقاب کریسی، ہݨ الزامات دی گردان بند تھیوݨی چاہیدی اے، ہݨ عوام کوں زیادہ بے وقوف نئیں ٻݨایا ونڄ سڳدا۔
