ملتان۔11مئی (اے پی پی):ایڈیشنل چیف سیکرٹری جنوبی پنجاب کیپٹن (ر) ثاقب ظفر دی ہدایات تے چولستان اچ کریہہ پاروں جاری ریلیف اتے ریسکیو آپریشن دے تحت چولستان ڈویلپمنٹ اتھارٹی 11 ریلیف بیس کیمپس ٻݨاڈتن ، جتھاں امدادی کماں کیتے ڈیزرٹ رینجرز دی مدد وی ڳھدی ڳئی اے، ایں صورتحال کوں دی ہر ویلھے نگرانی کیتی ویندی پئی اے۔اے کیمپ لیاقت پور، یزمان اتے فورٹ عباس تحصیلاں دے چولستانی علاقیں ہیڈ فرید، قلعہ ݙراوڑ، مٹھڑا بنگلہ،متاں والا، میر گڑھ، کالے پاڑ، چنݨ پیر،کتھڑی بنگلہ، چک 178/7آر،چک 147/5آر اتے چک 75/ڈی بی اچ ٻݨائے ڳئن۔ ایم ڈی چولستان ڈویلپمنٹ اتھارٹی محمد خالد ایڈیشنل چیف سیکرٹری جنوبی پنجاب کوں اڳونہی رپورٹ اچ آکھیے جو چولستان اچ سارے 8 واٹر سپلائی لائناں فعال ہن اتے صورتحال قابو اچ اے۔ رپورٹ اچ ݙسایا ڳئے جو آجڑیاں کوں مختلف وستیاں دے نیڑے گھن آیا ویندا پئے تاں جو جانوراں کیتے پاݨی تے ڳھا دا مسئلہ نہ تھیوے ۔سیکرٹری لائیو سٹاک جنوبی ہنجاب دی ہدایت تے محکمہ لائیو سٹاک 12 موبائل ویٹرنری ڈسپنسریز وی چولستان بھجوا ݙتن ۔ سیکرٹری لائیو سٹاک جنوبی پنجاب ناصر جمال ہوتیانہ ڈائریکٹر جنرل لائیو سٹاک ڈاکٹر منصور احمد دی اڳواݨی اچ ترائے رکنی کمیٹی وی بݨا ݙتی اے جیندے اچ ڈائریکٹر بہاولپور ڈاکٹر عامر بخاری اتے ڈائریکٹر چولستان ڈاکٹر سہیل خان شامل ہن۔
