اسلام آباد۔11مئی (اے پی پی) سپیکر قومی اسمبلی راجہ پرویز اشرف 1996ء دے پیپلز پارٹی دور اچ بھرتی تھیوݨ آلے بحال ملازمین دی سنیارٹی دا معاملہ کابینہ سیکرٹریٹ دی کمیٹی کوں ٻھیڄ ݙتے۔ قومی اسمبلی اچ نکتہ اعتراض تے پیپلز پارٹی دے رکن قادر خان مندوخیل آکھیے جو 1996ء دے بحال ملازمین 26 سالاں توں آپݨی سنیارٹی کیتے جدوجہد کریندے پئن، سپریم کورٹ ھک واری ول انہاں کوں بحال کیتے تے اساں سپریم کورٹ دے ٻاہروں احتجاج ویلھے انہاں نال وعدے کیتے ہاسے ، ایں معاملے تے خصوصی کمیٹی بݨائی ونڄے تاں جو انہاں 72 محکمیں توں انہاں دے 26 سالہ حقوق ݙیوائے ونڄن۔ انہاں آکھیے کراچی میݙے حلقے اچ 16 ،16 گھنٹے دی لوڈشیڈنگ اے اتھاں پاݨی تے گیس کائنی، حکومت ایں معاملے تے خصوصی توجہ کرے۔
