ملتان۔13مئی (اے پی پی):وزیر مملکت امور داخلہ عبدالرحمن خان کانجو آکھیے جو لانگ مارچ پاکستان تحریک انصاف دا جمہوری حق اے ، امن و امان دی صورتحال خراب کرݨ دی اجازت نہ ݙتی ویسی ۔لانگ مارچ ھک چنڳی سرگرمی اے جیڑھا جو پارٹی کوں متحرک رکھیندی ۔اے ڳالھ انہاں خمیس دی رات آپݨے اعزاز اچ ݙتے ڳئے عشائیے اچ میڈیا نال ڳالھ مہاڑ اچ آکھی اے ۔وزیر مملکت مزید آکھیے جو پی ٹی آئی مخصوص جاہ تے مارچ کرسڳدی اے جتھاں او چھی مہینے یا ھک سال ٻہہ سڳدن ، انہاں آکھیے لوکاں کوں پرتشددمارچ دے پاسے نہ گھن آیا ونڄے ، سیاست کرو مگر سیاست کوں ایں حد تئیں نہ گھن ونڄو ، ھک سوال دے ولدے اچ انہاں آکھیے جو الیکٹرانک ووٹنگ مشین استعمال کرݨ آلے ملک ول مینوئل طریقے تے واپس آندے پئن اساں آرٹی ایس دے متاثرین اچ شامل ہیسے۔ انہاں آکھیے اوورسیز کوں ووٹ دا حق نہ ݙیوݨ غلطی اے لیکن ایں کیتے طریقہ کاروضع کیتا ونڄے ۔وزیرمملکت آکھیے جو انتخابی اصلاحات ہی جمہوریت اتے ملکی اداریں دی بنیاد ہوندن ،موجودہ حکومت چاہندی اے جو وختی انتخابی اصلاحات دا کم تھیوے تے اساں وختی نویں انتخابات دے پاسے ونڄوں ۔
