پاکستان اچ ایں ویلھے ساریاں توں وݙا مسئلہ چولستان اچ پاݨی دا قحط اے، اساں ساریاں کوں رَل ٻہہ تے ایندا حل کرݨا چاہیدے، حافظ حسین احمد مدنی

اسلام آباد۔13مئی(اے پی پی سرائیکی نیوز سروس) پاکستان اچ ایں ویلھے ساریاں توں وݙا مسئلہ چولستان اچ پاݨی دا قحط اے، اساں ساریاں کوں رَل ٻہہ تے ایندا حل کرݨا چاہیدے۔ اے ڳالھیں ممبر صوبائی کونسل پاکستان پیپلز پارٹی جنوبی پنجاب اتے امیدوار قومی اسمبلی بہاولپور حافظ حسین احمد مدنی  اسلام آباد اچ رہوݨ آلے اسلامیہ یونیورسٹی بہاولپور توں پڑھݨ آلے الیکٹٖرانک اتے پرنٹ میڈیا دے پروفیشنلز کوں ݙتے ڳئے ظہرانے  اچ ڳالھ مہاڑ کریندیں ہوئیں آکھی۔ چولستان اچ پاݨی دے مسئلے تے الیندیں ہوئیں انہاں آکھیا جو ایں ویلھے پاکستان اچ ساریاں توں وݙا مسئلہ چولستان اچ پاݨی دا قحط اے۔ اساں ساریاں کوں رَل ٻہہ تے ایندا حل کرݨا چاہیدے۔ چولستان دا لائیو سٹاک اساݙے ملک دی معیشت اچ اہم کردار ادا کریندے اتے مقامی آبادی دے جیوݨ دا دارومدار انہاں زناوراں تے اے۔ اساں ݙے وسائل وی ہن پر نہراں دا پاݨی نہ ہووݨ پاروں سینکڑاں زناور مرڳئن اتے انساناں کوں وی پیوݨ دا پاݨی نی ملدا۔ حافظ حسین احمد مدنی  ٻیا آکھیا جو میں مطالبہ کرینداں جو ایں مسئلے کوں ترجیحی بنیاداں تے حل کیتا ونڄے۔