اسلام آباد۔14مئی (اے پی پی):وزیراعظم شہبازشریف یو اے ای دے صدر شیخ خلیفہ بن زید النیہان دی فوتکی تے تعزیت کیتے متحدہ عرب امارات ویسن ،وزیراعظم اڄ لندن توں متحدہ عرب امارات ویسن جتھاں اتوارکوں یو اے ای دے ولی عہد شیخ محمد بن زید النیہان نال مرحوم صدر دی فوتکی تے پرچاوݨی ݙیسن ، وزیر اعظم آفس میڈیا ونگ توں جاری بیان موجب وزیراعظم شہبازشریف یواے ای دی قیادت اتے عوام نال اظہار افسوس کریسن ، پاکستان دے عظیم دوست شیخ زیددی دے فوت تھیوݨ توں بعد شیخ خلیفہ بن زید اپِݨے والد دے مشن کوں قابلیت نال اڳوں ودھایا ۔وزیراعظم شہبازشریف تعزیتی پیغام اچ آکھیے جو شیخ زید یواے ای دی فیڈریشن دی بنیاد رکھی ہئی، شیخ خلیفہ اینکوں مزید تکڑا کیتا تے مثالی ترقی ݙتی ،50 سال دی مسلسل محنت توں شیخ خلیفہ یواے ای ککیتے اپݨے والد دے ترقیاتی وژن کوں اڳوں ودھایا ،شیخ خلیفہ مرحوم آپݨے دور اچ مشاورت کوں اپِݨی طاقت بݨایا ، او عوام نال رابطے اچ رہندے ہن ۔وزیراعظم تعزیتی پیغام اچ آکھیے جو او اعلی تعلیم یافتہ اتے زیرک شخصیت ہن جنہاں آپݨے اقتدار کوں ملک تے عوام دی خدمت دی کیتے وقف رکھیا ،شیخ زید وانڳوں شیخ خلیفہ بن زید النیہان دی وفات امت مسلمہ دا ھک وݙا ضیان اے ،وزیراعظم مرحوم دے اچے درجے اتے یواے ای دی حکومت اتے عوام کیتے صبردی دعا کیتی۔
