اسلام آباد۔15مئی (اے پی پی سرائیکی سروس) جماعت اہلسنت پاکستان دے راہنماواں آکھیا جو انٹرنیشنل سنی کانفرنس دا مقصدنفرتاں مُکا تے محبتاں ودھاوݨ اے، وطن عزیز ایں ویلھے ٻہوں اوکھ اچ اے اساکوں ہر حال اچ آپݨا کردار ادا کرݨا اتے ہر اوں قوت دے نال تھیوݨا پوسی جیڑھی جو پاکستان دے استحکام کیتے مخلص اے۔ اساکوں ہر اندرلی اتے ٻاہرلی سازشاں کوں ناکام ٻݨاوݨا پوسی۔ جماعت اہلسنت پاکستان ملک دی سالمیت اتے تحفظ کیتے ہر قسم دی قربانی ݙیوݨ کیتے تیار اے۔ اے ڳالھیں مرکزی ناظم اعلی جماعت اہلسنت پاکستان خالد سلطان القادری،مرکزی نائب ناظم ڈاکٹر حمزہ مصطفائی، ناظم انٹرنشنل سنی کانفرنس پیرسید شبیر حسین شاہ گیلانی اتے ٻئے نیشنل پریس کلب اسلام آباد اچ پریس کانفرنس توں خطاب کریندیں ہوئیں آکھی۔ ایں موقع تے علامہ مولانا محمد وزیر القادری،علامہ مولانا محمد اکرم سعدی،پیرا محمد گلزار نقشبندی،مفتی محمد اسلم ضیائی،راجہ ریاضت حسین نقشبندی، احمد حسن ہاشمی ، ملک ثاقب محمودایڈوکیٹ اتے ٻئے موجود ہن۔ مرکزی ناظم اعلی جماعت اہلسنت پاکستان خالد سلطان القادری اتے ٻنہاں آکھیا جو جماعت اہلسنت پاکستان ہک غیر سیاسی نظریاتی مذہبی تنظیم اے۔ جماعت اہلسنت پاکستان جتھ نظریہ اسلام دے ودھارے کیتے کوشش کریندی راہندی اے او پاکستان دی نظریاتی سرحداں خصوصی طور نظریہ پاکستان دے فروغ اتے تحفظ کیتے وی کوشش کریندی راہندی اے۔ ایں ویلھے ملک جیڑھے مسئلیاں اچ اے اساں ساریاں دی ذمہ واری ٻݨدی اے جو آپݨا کردار ادا کروں۔ ایں بارے 15 مئی کوں اسلام آباد دے علاقے گلبرگ اچ سویلے ݙاہ وڄے توں مغرب دی نماز تئیں عالمی سنی کانفرنس تھیندی پئی اے۔ جئیں اچ پورے ملک دے علاوہ ٻاہرلے ملکوں وی علماء کرام تشریف ڳھدی آندن جئیں اچ خصوصی طور شیخ عبدالعزیز عبدالرزاق اشولہ نائجیرین سپریم کونسل برائے اسلامی امور اتے75توں ودھ کتاباں دے مصنف شیخ نور الدین ابراہیم وبانی عرفان سنٹربرائے تحقیق تے ترقی نائجیریا شامل ہن۔
