اسلام آباد۔16مئی (اے پی پی):وزیراعظم شہباز شریف ولوں سابق وزیراعظم عمران خان دی فُول پروف سکیورٹی کوں یقینی بݨاوݨ دی ہدایت تے وزارت داخلہ پولیس اتے ٻئے قانون نافذ کرݨ آلے اداریں کوں سابق وزیراعظم کیتے مقررسکیورٹی فورسز دی تعیناتی تے مکمل عملدرآمد کیتے آکھیا ڳئے۔ وزارت داخلہ دی طرفوں جاری بیان موجب سابق وزیراعظم عمران خان دے بنی گالہ ہاؤس دی سکیورٹی کیتے پولیس اتے ایف سی دے 94اہلکارتعینات کیتے ڳئن ،اسلام آباد پولیس دے 22 جݙاں جو ایف سی دے 72 اہلکار شامل ہن۔ ایں توں انڄ خیبرپختونخوا پولیس دی طرفوں 36، گلگت بلتستان پولیس دے 6 اہلکاران کوں وی انہاں دی متعلقہ حکومتاں دی طرفوں سابق وزیراعظم دی سکیورٹی کیتے تعینات کیتا ڳئے ۔ایس ایم ایس سکیورٹی کمپنی دے 26اتے عسکری سکیورٹی کمپنی دے 9 اہلکار وی بنی گالہ ہاؤس دی سکیورٹی تےمامورہن۔سابق وزیراعظم عمران خان دی دارالحکومت اسلام آباد توں ٻاہر موومنٹ دے دوران اسلام آباد پولیس دیاں 4 گاݙیاں اتے 23 اہلکار جݙاں جو رینجرر دی ھک ڳاݙی تے 5اہلکاران دے نال ہر ویلھے موجود ہن ۔وزارت داخلہ دے زیرنگران تھریٹ اسیسمنٹ کمیٹی سابق وزیراعظم عمران خان دی سکیورٹی متعلق معاملات دامسلسل جائزہ گھندی پئی اے ۔ وزیراعظم شہباز شریف وی ایں سلسلے اچ واضح ہدایات ݙتن ۔ وزارت داخلہ دی طرفوں جاری بیان موجب سابق وزیراعظم عمران خان کنے جے کوئی مخصوص اطلاع اے تاں او اینکوں وزارت داخلہ نال ضرورشئیر کرن تاں جو انہاں کیتے سکیورٹی دے مزیدانتظامات کیتے ونڄ سڳن ۔ گذریل کجھ ݙینھ توں سابق وزیراعظم عمران خان عوامی اجتماعات اچ آپݨی جان کون ممکنہ خطرات متعلق ݙسیندے پئن ۔بطور سابق وزیراعظم انہاں دی ذمے واری اے جو او آپݨی جان کوں لاحق ممکنہ خطرات ،سازش اتے ٻئے معاملات دا وزارت داخلہ تے متعلقہ اداریں کوں ݙساون ۔وزارت داخلہ،سابق وزیراعظم عمران خان توں ڳھدی ڳئی معلومات تے شواہد دی روشنی اچ مزید اقدامات کریسی۔
