اسلام آباد۔19مئی(اے پی پی)بھارت ولوں غیر قانونی مقبوضہ جموں اتے کشمیر اچ حق خود ارادیت کوں لتاڑݨ کیتے متعصبانہ اتے ضالمانہ ہتھکنڈے جاری ہین، آر ایس ایس نواز بھارتی حکومت دی تݙ تے بھارتی عدلیہ وی پچھو نئیں رہی اتے کشمیری حریت رہنما یاسین ملک دے خلاف جانبدارانہ اتے متعصبانہ فیصلہ ݙیندے ہوئے انہاں کوں کوڑے کیس اچ مجرم قرار ݙے ݙتے۔ دہلی دی عدالت حریت رہنما دے خلاف سزا دا فیصلہ 25 مئی کوں سݨیسی۔ حریت رہنما یاسین ملک آپ تے لائے ڳئے الزامات کوڑے قرار ݙیندے ایکوں بھارتی حکومت دی انتقامی کارروائی آکھیے۔ ٻئے پاسو پاکستان پہلے ہی بھارت کوں کشمیری حریت رہنما یاسین ملک دے خلاف اے کوڑا کیس ختم کرݨ دا مطالبہ کر چکیے۔ یاسین ملک ایں ویلھے بھارت دی تہاڑ جیل اچ وݙے عرصے توں قید ہین جتھاں انہاں تے قید و بند دے پہار سودھا وݙے مظالم ڈھائے ویندن، ایں بارے انہاں دی اہلیہ مشعال ملک تحقیقات اتے رہائی دا مطالبہ وی کرچکی اے۔
