اسلام آباد۔19مئی(اے پی پی)امریکی ڈالر دے مقابلے اچ روپے دے بے قدری ݙکݨ کیتے وفاقی حکومت لگژری اشیا دی امپورٹ تے مکمل پابندی لا ݙتی اے جیندے اچ وݙیاں ڳاݙیاں، امپورٹڈ چاکلیٹ، موبائل فونز، ہوم اپلائنسز، کراکری آئٹمز، شوز، ڈیکوریشن دا سامان، سینٹری ویئر، فش فروزن، کارپٹ، ٹشو پیپر، فرنیچر، میک اپ اتے شیمپو شامل ہین۔ اسلام آباد اچ میڈیا اچ الیندے ہوئے وفاقی وزیر اطلاعات مریم اورنگزیب آکھیا جو پچھلے 4 سال اچ ملکی معیشت کوں تباہ برباد کیتا ڳئے، 4 سال امپورٹڈ حکومت، امپورٹڈ مشیر اتے ترجمان ہن، انہاں کوں شرم آوݨی چاہیدی اے جو ڈالر 189 انہاں دے دور حکومت اچ گئے، عالمی مالیاتی ادارے ( آئی ایم ایف) دے معاہدے تے عمران خان دستخط کیتن جیندی وجہ نال اڄ مہانڳ اے، ملکی قرض 25 ہزار ارب توں 47 ہزار ارب تھی چکیے۔ انہاں آکھیا جو 90 ݙینھ اچ کرپشن مکاوݨ الیاں 4 سال او ملک لٹیے جیندی کوئی حد نئیں، سارے امپورٹڈ مشیر ترجمان ٻاھرو لڳے ڳین۔ انہاں آکھیا جو وزیراعظم شہبازشریف کوں ڈالر دا ملھ ٹی وی توں نئٰں پتا لڳدا او سمدے نئیں صرف محنت کریندن۔ انہاں آکھیے جو حکومت سارے غیرضروری لگژری آئٹمز تے پابندی لیندی پئی اے، اے چیزاں جیویں وݙیاں ڳاݙیاں، امپورٹڈ موبائل، ہوم پلائنسز، کراکری آئٹمز، شوز، ڈیکوریشن آئٹمز، سینٹری ویئر، فش فروزن، کارپٹ، ٹشوپیپر، فرنیچر، میک اپ، شیمپو، فروٹس، ڈرائی فروٹس عام آدمی دے استعمال دیاں نئیں ہوندیاں تہوں انہاں تے پابندی لڳدی پئی اے۔ وزیراطلاعات آکھیا جو 4 سال جیڑھی معاشی دہشتگردی کیتی ڳعی اے ایکوں سنبھالݨ کیتے سارے انتظامات کیتے ویندے پن، معاشی منصوبہ بندی سانڳے پاکستانیاں کوں قربانی ݙیوݨا ہوسی، امپورٹ ڳھٹا تے ایکسپورٹ ودھائی ویسی، لوکل انڈسٹریز کوں ترقی و روزگار ملسی۔ مریم اورنگیز آکھیا جو عدالتاں آئین شکناں دے خلاف کھلین، کوئی رووے یا چیکے الیکشن اساں ہی کرویسوں، شہباز شریف اٹا، ڳھیو، کھنݙ پٹرول سودھا ساریاں شئیں سستیاں کرݨ آئے۔
