اقوام متحدہ۔26مئی (اے پی پی) پاکستان اقوام متحدہ دی سلامتی کونسل اچ بھارتی عدالت دی طرفوں کشمیری حریت رہنما یاسین ملک کوں دہشت گردی دے کوڑے مقدمے اچ عمر قید دی سزا دی مذمت کریندے ہوئیں ایں فیصلے کوں بھارت دے غیر قانونی زیر تسلط جموں و کشمیر اچ بھارتی جبر اتے ظلم دی نویں مثال قرارݙتا ۔ اقوام متحدہ اچ پاکستان دے مستقل مندوب منیر اکرم سلامتی کونسل اچ ’’مسلح تصادم اچ شہریاں دا تحفظ ‘‘ دے موضوع تے بحث دے دوران آکھیے جو ٻئی نو آبادی طاقتاں وانڳوں بھارت کشمیر دی جدوجہد آزادی کوں دہشت گردی دے طور تے پیش کیتے جیڑھی انہاں دی ھک قانونی جدو جہد کوں دباوݨ دی کوشش اے تے اے بین الاقوامی قوانین دی خلاف ورزی تے جنگی جرائم دے زمرے اچ آندے ، انہاں آکھیے جو بھارت دی کینگرو عدالت دا کشمیری حریت رہنما یاسین ملک دے خلاف دہشت گردی دے کوڑے مقدمے اچ عمر قید دی سزا دا فیصلہ بھارتی جبر دی تازہ مثال اے۔ انہاں وزیراعظم پاکستان محمد شہباز شریف دے بیان دا حوالہ ݙتا جیں اچ انہاں آکھیے بھارت یاسین ملک کوں قید کرسڳدے لیکن انہاں جدوجہد آزادی دا جیڑھا تصور پیش کیتے اینکوں کݙاہیں قید نی کرسڳدا ۔ پاکستانی مندوب منیر اکرم سوال چاتے جݙاں فوج دیاں کارروائیاں دا مقصد شہریاں دی آواز کوں دباوݨ اے تاں شہریاں کوں کیویں تحفظ ݙتا ونڄے ؟ اے او معاملہ اے جݙاں غیر ملکی قابض فوج لوکاں کوں انہاں دے حق خود ارادیت توں محروم کرتے آپݨے غیر قانونی قبضے کوں برقرار رکھݨ دیاں کوششاں کریندن ۔
