اسلام آباد۔27مئی (اے پی پی):وزیراعظم شہباز شریف آکھیے جو حکومت کوں بلوچستان دیاں محرومیاں دا احساس اے جنہاں کوں مکاوݨ کیتے ترجیحی بنیاداں تے اقدامات کیتے ویندے پئن ، ہیضہ دی وبا دے سدباب کیتے وفاقی و صوبائی اداریں، بالخصوص ڈاکٹرز اتے پیرا میڈیکل سٹاف دیاں کوششاں قابلِ ستائش ہن۔ وزیراعظم آفس دے میڈیاونگ توں جاری بیا موجب اے ڳالھ انہاں وزیرِ انسدادِ منشیات نوبزادہ شاہ زین بگٹی نال ڳالھ مہاڑ کریندے ہوئیں آکھی جنہاں جمعے کوں اتھاں انہاں دے نال ملاقات کیتی ۔ ملاقات اچ موجودہ ملکی سیاسی صورتحال تے تفصیلی ڳالھ مہاڑ تے مشاورت کیتی ڳئی ۔ملاقات ا نوبزادہ شاہزین بگٹی وزیرِ اعظم کوں پیر کوہ ڈیرہ بگٹی اچ ہیضہ دی وباء تے قابو پاوݨ دے کامیاب آپریشن دی تفصیلات ݙساوݨ دے نال نال وزیرِ اعظم دی ایں اقدام اچ خصوصی دلچسپی تے بلوچستان دے متاثرہ خانداناں دی فی الفور مدد تے خراجِ تحسین پیش کیتا۔وزیرِ اعظم مقامی آبادی کوں صاف پاݨی ݙیوݨ دے حوالے نال اقدامات کوں یقینی بݨاوݨ تے مستقبل اچ ایجھے واقعات توں بچݨ کیتے جامع حکمتِ عملی بݨاوݨ دی ہدایت جاری کیتی ۔ ایں موقع تے وزیراعظم آکھیے جو حکومت کوں بلوچستان دیاں محرومیاں دا احساس اے جنہاں کوں مکاوݨ کیتے حکومت ترجیحی بنیاداں تے اقدامات کریندی پئی اے ۔ ہیضہ دی وبا دے سدباب کیتے وفاقی و صوبائی اداریں، بالخصوص ڈاکٹرز اتے پیرا میڈیکل سٹاف دیاں کوششاں قابلِ ستائش ہن۔
