چولستان اچ مینھ نہ ہووݨ دی وجہ توں خشک سالی تے پاݨی دی گھٹکی دا سامݨا اے، وفاقی وزیر برائے انسانی حقوق ریاض حسین پیرزادہ

اسلام آباد۔30مئی(اے پی پی سرائیکی سروس) وفاقی وزیر برائے انسانی حقوق ریاض حسین پیرزادہ آکھے جو چولستان اچ مینھ نہ ہووݨ دی وجہ توں خشک سالی تے پاݨی دی گھٹکی دا سامݨا اے ، انھاں علاقیاں اچ پانڑی دا ہووݨ یقینی بنڑاوݨ کیتے نویں وسائل کم اچ گھن آوݨ دی لوڑ اے ، متعلقہ اداریا ں تے عوام دے تعاون نال پسماندہ طبقات کیتے مسئلیاں کوں حل کیتاونج سگدا اے ، سرائیکی صوبہ سمیت کہیں وی نویں صوبے دے قیام کیتے آئین دے آرٹیکل (1)اچ ترمیم کرݨٰی ہوسی۔ انھاں خیالیں دا اظہار انھاں سرائیکی علاقیاں توں تعلق رکھݨ آلے اسلام آباد اچ مقیم صحافیاں نال ملاقات وچال کیتا۔ وفاقی وزیر آکھے جو چولستان اچ مینھ نہ ہووݨ تےنہراں دی بندش توں خشک سالی اتے پاݨی دی گھٹکی دا سامݨا اے ، پہلے جون ، جولائی تئیں پاݨی ہوندا ہا ایں ویلھے وقت پاݨی دا مسئلہ تاں ہے پیا تانجوں بعد اچ چولستان دیاں زمیناں تے قبضے دے بعد پاݨی دا مسئلہ تھیا اے جیندے خلاف انھاں اسمبلی اچ وی اواز چاتی ہئی کیونجو قابضین انھاں علاقیاں کوں پاݨی دی فراہمی روک ݙتی اے جیندے پاروں قحط اتے خشک سالی دا امکان تھی گئے انھاں آکھے جو رواں سال مینھ نہ ہووݨ دی وجہ توں دریاواں اچ پاݨی بہوں گھٹ اے ، جے تئیں مینھ نہ تھیسی چولستان سمیت پورے ملک اچ پاݨی دا مسئلہ حل نہ تھیسی ۔

انھاں آکھے جو چولستان دیاں زمیناں شکارگاہ دے ناں تے ویچیاں گئین ، جیڑھلے او صوبائی اسمبلی دے ممبر ہن تاں انھاں اے معاملہ سیّد یوسف رضا گیلانی کوں ڈسایا ہا تے انھاں کوں مشورہ ڈتا ہا جو چولستان کوں زناوراں سانگے محفوظ علاقہ بنڑایا ونجے اتے ایں علاقے کوں بچایا ونجے پر کہیں وی ایندے تے توجہ نہ ڈتی تے نہ ہی ایں حوالہ نال کم کیتا جڈاں جو بہاولپور کوں محض شکار گاہ بݨا ڈتا گیا، چولستان اچ تلور دے شکار تے شہزادے آندن ، تلور کوں بچاوݨ سانگے انھاں قومی اسمبلی اچ آواز چاتی جو اے علاقے شکار کیتے الاٹ نہ کیتے ونجن جیندے پاروں انھاں کوں اوکھ دا سامݨا اے ، ایندے نال قومی خزانے دا زیان تھیندا اے ، وفاقی وزیر آکھے جو ہمیشہ طاقتور غریباں دے حقوق سلب کریندا اے ۔ انھاں دے حقوق دے حصول کیتے عوام دی مدداتے جرأت دی ضرورت ہوندی اے ۔ سرائیکی صوبے دے حوالے نال سوال دے جواب اچ انھاں آکھیا جو نویں صوبےدے قیام کیتے آئین دے آرٹیکل (1) اچ تبدیلی دی ضرورت اے جیندے کیتے ݙوں تہائی اکثریت د ی ضرورت اے، ایں ترمیم دے بعد این ایف سی ایوارڈ توں حصے دا فیصلہ ہوسی ، سینٹ اچ نشستاں دا ودھارا کرݨا پوسی ، اے سب کون کریسی ، ایں سانگے سرائیکی صوبے دا قیام اوکھا چیلنج اے۔ انھاں آکھے جو چولستان دے علاقے اچ جڈاں کہیں کوں ٹوبھا ملدے تاں وراثت اچ انتقال تھیندے ، قابضین کوں چاہیدا اے جو او مقامی بندیاں دیاں چراہ گاہواں اتے انھاں دے ٹوبھے انھاں کوں واپس کرن ایندے نال لوکیں سانگے روزگار دے مواقع ملسن ۔ وفاقی وزیر ریاض حسین پیرزادہ دا آکھݨ ہا اتھاں دے مقامی لوکیں نال ذاتی تعلق اے، انھاں توں ووٹ گھنݨ کیتے نی جڈاں جو انھاں دے مسئلیاں دے حل کیتے اواز چیندا ، میں چاہنداں جو انھاں دے مسئلے حل کیتے ونجن ۔