انقرہ۔1جون (اے پی پی):وزیرِاعظم شہباز شریف نال ترک وزیر خارجہ میولیود چائوش اولو اڄ ٻدھ کوں ملاقات کیتی ۔ملاقات اچ ݙو پاسے تعلقات کوں ودھاوݨ تے ڳالھ مہاڑ تھئی ۔ ملاقات اچ پاکستان تے ترکی دی اعلیٰ قیادت شریک ہئی ۔وزیراعظم آفس دے میڈیاو نگ توں جاری بیان موجب وزیر اعظم اڄ ترک صدر رجب طیب اردوان نال ملاقات کریسن ۔ وزیراعظم کوں صدارتی محل اچ ترک صدر رجب طیب اردگان نال ملاقات کیتے ترک روایات دے مطابق جانثاری دستے دے حصار اچ گھن آیا ویسی ۔ وزیرِ اعظم دا گارڈ آف آنر دے نال شاندار استقبال کیتا ویسی ۔ وزیرِ اعظم پاکستان تے ترک صدر دی ملاقات دے بعد وفد دی سطح تے ملاقات تھیسی جیں توں بعد ݙوہیں رہنما میڈیا نال ڳالھ مہاڑ کریسن ، وزیرِ اعظم شہباز شریف جیڑھے جو ترکی دے ترائے ݙینھ دے دورے تے ہن ، وزیرِ اعظم شہباز شریف مصطفی کمال اتاترک دے مزار تے حاضری وی ݙیسن ۔ ایندے توں پہلے گزریل رات وزیراعظم ترکی دی یونین آف چیمبرز اینڈ کموڈٹی ایکسچینجز (ٹی او بی بی) دے زیر اہتمام تقریب اچ شرکت کیتی۔ ایں موقع تے آپݨے خطاب اچ وزیراعظم شہباز شریف آکھیے جو او پاکستان تے ترکی وچال تجارتی اتے اقتصادی شراکت داری ودھاوݨ چاہندن ، ݙوہیں ملکاں دی کاروباری برادری آندے ترائے سالاں اچ تجارت اچ 5ارب ڈالر ودھارے دا ہدف مقرر کرے ،ایں ہدف دے حصول کیتے حکومت ہر ضروری قدم چیسی ۔ وزیراعظم دا خیرمقدم کریندے ہوئیں یونین آف چیمبرز دے صدر رفعت حسار سک لیوگلو ترکی دے سرمایہ کاراں اتے کاروبار شخصیات دی طرفوں پاکستان دے نال اقتصادی تے تجارتی تعاون کوں مضبوط بݨاوݨ تے سرمایہ کاری کرݨ اچ دلچسپی ظاہر کیتی اے ۔ وزیراعظم آپݨے خطاب اچ پاکستان اتے ترکی وچال نیڑے برادرانہ تعلقات تے اوکھے ویلھے ݙوہیں قوماں دے ھک ݙوجھے دا ساتھ ݙیوݨ دی تابندہ روایات کوں اجاگر کیتا۔ وزیر اعظم ترک صدر رجب طیب اردوان دی زبردست قیادت اچ ترکی دی غیر معمولی ترقی دی تعریف کیتی ۔
