وزیراعظم شہباز شریف دا پاکستان ترکی بزنس کونسل توں خطاب، ترک سرمایہ کاراں کوں پاکستان اچ سرمایہ کاری دی دعوت

انقرہ۔1جون (اے پی پی):وزیراعظم شہباز شریف آکھیے جو پاکستان تے ترکی وچال تجارتی تعلقات کوں ودھارا ݙیوݨ دے ٻہوں سارے موقع موجود ہن ، ترک سرمایہ کار ایں توں فیدہ چاون ، حکومت ہر ممکن سہولت ݙیسی ، خوشحال معاشرے دی تشکیل کیتے افکار تازہ اتے جدید مہارتاں کوں بروئے کار گھن آوݨ دی لوڑھ اے ، پاکستان ترکی بزنس کونسل دی تقریب توں خطاب کریندے ہوئیں وزیراعظم آکھیے جو پاکستان تے ترکی وچال گھاٹے رشتے استوار ہن اتے ݙوہیں ملک دوستی دے مضبوط ڳانڈھے اچ ڳنڈھیے پئن ، ݙوہیں ملکاں دی زبان انڄ لیکن ثقافت ھک ہی اے، پاکستان اتے ترکی ہر اوکھے ویلھے ھک ݙوجھے دا ساتھ ݙتا ، ترک عوام زلزلے، سیلاب اتے ٻئی قدرتی آفات اچ پاکستان دے نال ٻہوں تعاون کیتے ، انہاں آکھیے پوری دنیا کوں کورونا وائرس دی وبا اتے روس یوکرین جنگ پاروں معاشی مشکلات دا سامݨا اے۔ وزیراعظم آکھیے جو گزریل رات ترک تاجراں نال تفصیلی ڳالھ مہاڑ تھئی ، ݙوہیں ملکاں وچال تجارت اتے عوامی رابطے ودھاوݨ دے موقع موجود ہن ، انہاں ترک تاجراں اتے سرمایہ کاراں کوں پاکستان اچ سرمایہ کاری دی دعوت ݙیندے ہوئیں آکھیے جو ترک سرمایہ کاراں دی پاکستان اچ سرمایہ کاری کوں قدر دی نگاہ نال ݙیکھدوں ۔