مظفرگڑھ۔1جون (اے پی پی) مظفرگڑھ،علی پور اچ گزریل رات مقتولین کوں دفنا ݙتا ڳیا، پنڄ جنازے کٹھے چوݨ تے کہرام مچ ڳیا ۔ یاد راہوے جو گزریل ݙینھ علی پور دے ہک گھر توں ذال پئے اتے ٻالاں دی پنڄ نعشاں برآمد تھی ہن، پئے دی لاش پھندے نال چھت تے لٹکی ہوئی ہئی جݙانجو ذال اتے ترائے ٻالاں دی ڳچی کپی ہوئی ہئی۔ مقتولہ سائرہ بی بی دے پیو محمد عباس دی تھاݨاں سٹی علی پور اچ درج ایف آئی آر دے مطابق مظفرگڑھ دی تحصیل علی پور اچ خیرپور روڈ تے محلہ مستوئی والا اچ گزریل ݙینھ شام چار وڄے آپݨے داماد عبدالغنی دے گھر ڳیا ، کافی دیر تئیں دستک ݙیوݨ تے در نہ کھلیا تاں او کندھی ٹَپ تے اندر ڳئے تاں آپݨے داماد محمد عمران دی لاش کوں پھندے نال چھت نال لٹکیا ݙٹھا اتے آپݨی دھی سائرہ بی بی عمر 27 سال اتے آپݨی ترائے نواسیاں حسیبہ عمر ست سال حسنہ عمر پنڄ سال اتے ہانیہ عمر ترائے سال کوں ڳچی کٹی ہئی مردہ حالت اچ ملی۔ پولیس تھاݨاں سٹی علی پور مقتولہ سائرہ بی بی دے پیو محمد عباس دی مدعیت اچ نامعلوم ملزماں دے خلاف مقدمہ درج کر تے تفتیش شروع کر ݙتی اے۔ ابتدائی تفتیش دے مطابق پولیس شبہ کیتے جو متوفی عمران پہلے آپݨی ذال اتے ٻالاں کوں ذبح کیتے اتے ولا خودکشی کر ڳھدی اے۔ جڈانجو مدعی دا آکھݨ اے جو کندھی تے قاتل دا ناں اتے فون نمبر لکھیا ہوئے جئیں کوں مقتول مرݨ توں پہلے خود لکھیے۔ پولیس تحقیقات شروع کر ݙتی اے۔
