اسلام آباد۔1جون (اے پی پی) وزیر اعظم محمد شہباز شریف نال ترکی دے وزیر خارجہ میولود چائوش اولو بدھ کوں انقرہ اچ ملاقات کیتی۔ وزیراعظم آفس ولوں جاری بیان موجب وزیراعظم ، ترک وزیر خارجہ نال ڳالھ مہاڑ کریندیں ہوئیں آندے ترائے سالیں اچ پاکستان اتے ترکی دے ݙو پاسہ تجارتی حجم کوں پںج ارب ڈالر تئیں ودھاوݨ دی اہمیت تے زور ݙتا۔ انہاں آکھیا جو ترک کمپنیاں کوں پاکستان اچ مکمل سہولتاں ݙتی ویسن، انہاں ترکی دی کمپنیاں کوں فوڈ پروسیسنگ، زراعت، آٹوموٹو، آئی ٹی، پن بجلی، سولر اتے ونڈ انرجی سودھے مختلف شعبیاں اچ سرمایہ کاری کرݨ دی دعوت ݙتی۔ وزیر اعظم محمد شہباز شریف آکھیا جو پاکستان اتے ترکی دے ݙو پاسہ تعلقات اچ غیر معمولی طور تے گہری گرمجوشی رہی اے کیونجو ݙوہیں ملکاں دی عوام وچال صدیاں پراݨے خصوصی رشتے ہن۔ وزیر اعظم محمد شہباز شریف ، مختلف علاقائی اتے بین الاقوامی مسئلیاں تے ݙوہیں ملکاں وچال ہم آہنگی کوں ٻیا اجاگر کیتا اتے رابطے جاری رکھݨ دی لوڑھ تے زور ݙتا۔
