لاہور۔1جون(اے پی پی)صوبائی وزیر عطا تارڑ آکھیے جو آئینی طور تے گورنر پنجاب حلف چا ڳھدے اتے صوبائی کابینہ وی ٻݨ ڳئی اے، پنجاب کابینہ گھیو اتے کھنݙ تے رعایت ݙیوݨ دی منظوری ݙے ݙتی اے۔ اے ڳالھ انہاں لاہور اچ صوبائی کابینہ دے پہلے اجلاس دے فیصلیاں بارے میڈیا بریفنگ اچ آکھی۔ انہاں آکھیا جو کابینہ دا پہلا اجلاس وزیر اعلی پنجاب حمزہ شہباز دی اڳواݨی اچ تھئے جئیں امن و امان، لوکاں کوں سستیاں شئیں فراہم کرݨ اتے کھاوݨ پیوݨ دیاں بنیادی شئیں تے سبسڈی سانڳے مواقع دا جائزہ ڳھدے، کابینہ رمضان المبارک اچ اٹے، کھنڈ اتے ٻیاں شئیں تے سبسڈی جاری رکھݨ دا فیصلہ کیتے، صوبے کݨک خریداری دا 50 لکھ ٹن ہدف پورا کر ڳھدے۔ انہاں آکھیا جو غریباں کوں اٹے دا 10 کلو دا تھیلا 4 سو روپے تے ملسی، کابینہ گھیو اتے کھنݙ تے رعایت ݙیوݨ دی منظوری ݙے ݙتی اے جیندا اعلان آپ وزیر اعلی پنجاب کریسن۔ صوبائی وزیر عطا اللہ تارڑ آکھیا جو پنجاب حکومت کے پی کے کوں اٹا ݙیوݨ کیتے ایم او یو کرݨ دا فیصلہ کیتے۔ اجلاس امن و امان دا جائزہ ڳھدے اتے ایں سانڳے پنجاب پولیس نال اظہار یکجہتی کیتا ڳئے جو کہیں وی صوتحال اچ پولیس افسران کوں بہترین قانونی معاونت ݙتی ویسی۔ انہاں آکھیا جو کابینہ اچ تیکھے توسیع کیتی ویسی اتے پنجاب دی قائمہ کمیٹیاں ٻݨایاں ویسن۔
