انقرہ۔1جون (اے پی پی):وزیراعظم محمد شہباز شریف اتے ترکی دے صدر رجب طیب اردوان ݙوہیں بھرا ملکاں وچال بہترین ݙوپاسے تعلقات کوں مختلف شعبیں اچ ݙو پاسے تعاون کوں اتے تئیں پڄاوݨ دے آپݨے عزم دا اعادہ کیتے ۔ ملاقات دے بعد مشترکہ پریس کانفرنس توں خطاب کریندے ہوئیں وزیراعظم محمد شہبازشریف آکھیے ݙوہیں ملکاں وچال تعلقات مشترکہ تاریخ اتے مقاصد تے مبنی ہن، اے تعلقات نسل در نسل جاری ہن۔ انہاں آکھیے اڄوکے سال ݙوہیں ملکاں آپݨے سفارتی تعلقات دے قیام دی 75ویں سالگرہ منیندے پئن ۔ وزیراعظم صدر اردوان نال ملاقات کوں نتیجہ خیز قرار ݙیندے ہوئیں امید ظاہر کیتی اے جو ترک صدر دی فعال قیادت اچ ݙو طرفہ تعلقات اتے تئیں پڄیسوں ۔ ترکی دے صدر رجب طیب اردوان آکھیے جو ملاقات اچ انہاں علاقائی اتے بین الاقوامی مسئلیں تے تفصیلی ڳالھ کیتی ۔ انہاں ݙو طرفہ تعلقات دے دائرہ کار کوں ودھاوݨ دا وی اعادہ کیتا۔ انہاں آکھیے جو ستمبر اچ اسلام آباد اچ اعلیٰ سطحی اجلاس منعقد تھیسی جیں توں ݙوہیں ملکاں کوں آپݨے بھرپی آلے تعلقات کوں مزید ودھارا ݙیوݨ دا موقع ملسی۔ صدر اردوان ایں عزم دا اظہار کیتے ݙوہیں ملکاں وچال نیڑے یاری تے تعاون کوں مزید مضبوط کیتا ویسی ، ایں توں پہلے ݙوہیں رہنماواں سانجھے مفادات دے مختلف شعبیں اچ تعاون ودھاوݨ کیتے مختلف معاہدیں تے مفاہمت دی یادداشتاں تے دستخط تھیندے وی ݙٹھا ۔
