اسلام آباد۔5جون(اے پی پی)وفاقی وزیر برائے موسمیاتی تبدیلی سینیٹر شیری رحمان آکھیے جیکر ویلھے تے اقدامات نہ تھئے تاں موسمیاتی تبدیلی ملک اتے آندی نسل کیتے نقصان دہ ہوسی، یوم ماحولیات تے اپݨے سنیہے اچ وفاقی وزیر آکھیا جو ”یوم ماحولیات” مناوݨ دا مقصد لوکاں کوں موسمیاتی تبدیلیاں دی سنڄاݨ ݙیوݨ اے جو نہ صرف پاکستان اتے جنوبی ایشیا ٻھل پورے ڄڳ اچ موسمیاتی تبدیلیاں دے غیر معمولی اثرات پوندے پن، موسمیاتی تبدیلی 21 ویں صدی دا سب توں وݙا چیلنج اے، اساں بحیثیت پاکستانی قوم عالمی موسمیاتی ایمرجنسی اچ ساریاں دے نال کھڑے ہیں جو پاکستان وی موسمیاتی تبدیلیاں پاروں متاثر تھیندا پئے جتھاں کریہے اتے شدید درجہ حرارت سودھا بدلدے موسماں دا چیلنج اے، جنگلات سڑدے پن، گلیشیئر پگھردے پن اتے دریا سکدے ویندن، ساکوں پاݨی دے استعمال اچ احتیاط ورتݨی ہوسی، ساکوں سمندر، ہوا اتے زمین کوں آلودگی توں بچاوݨے۔
