ملتان۔6جون (اے پی پی) پاکستان تے ویسٹ انڈیز وچال ترائے ھک ݙینھ وار میچاں دی سیریز دے موقع تے ملتان اچ سخت حفاظتی انتظامات کیتے ڳئن۔ ملتان دی سکیورٹی ہائی الرٹ اے اتے کرکٹ ٹیماں تے ایندے روٹس دی حفاظت کیتے خصوصی انتظامات کیتے ڳن۔ ڈپٹی کمشنرملتان طاہر وٹو دے مطابق قومی مہماناں دی سکیورٹی یقینی ٻݨاوݨ کیتے 6 ہزار پولیس اہلکارتعینات کیتے ڳئن ایں توں انڄ رینجرزتے پاک فوج دی خدمات وی ڳھدیاں ڳئن۔ 5جون توں 12جون تئیں ملتان اچ سکیورٹی ریڈ الرٹ رہسی ۔ کرکٹ ٹیماں کوں جیڑھے ہوٹلاں اچ رہایا ڳئے اتھاں وی سخت حفاظتی اقدامات ہن ۔جیڑھیاں سڑکاں تے اے ہوٹل موجود ہن انہاں اچ بہاولپور روڈ، ابدالی روڈ، عظمت واسطی روڈ شامل ہن۔ ساریاں سڑکاں ملتان دیاں مصروف سڑکاں ہن تے انہاں کوں کل ݙوپہریں توں عام ٹریفک کیتے بند کرݙتا ڳئے ۔سڑکاں بند تھیوݨ پاروں نیڑے سڑکاں،ڳلیاں اتے رستیں تے ٹریفک جام رہی ۔خاص طورتے کارڈیالوجی ہسپتال تے ایندے نیڑے علاقیں اچ کجھ ایمبولینسیں وی ٹریفک اچ پتھیاں رہیاں ۔
