اسلام آباد۔6جون (اے پی پی) وفاقی وزیر اطلاعات و نشریات مریم اورنگزیب بی جے پی رہنماواں دے نبی کریم صلی اللہ علیہ وسلم دی شان اچ گستاخانہ بیانات دی شدید الفاظ اچ مذمت کریندے ہوئیں آکھیے جو خاتم المرسلین نبی رحمت حضرت محمدﷺدی ناموس اچ گستاخی کر تے بی جے پی دے رہنماواں خود کوں جھکا ثابت کیتے۔ آپݨے ھک بیان اچ انہاں آکھیے جو دنیا دے سارے انساناں کیتے رحمت بݨ تے آوݨ آلے نبی اکرمﷺ دی پاک سیرت و کردار دا مطالعہ کرݨ آلا کوئی وی سلیم الفطرت انسان انہاں دا احترام تے ادب کیتے بغیر نی رہ سڳدا ۔ انہاں آکھیے بی جے پی رہنماواں دے گستاخانہ بیانات دی شدید ترین الفاظ اچ مذمت کریندوں ، اے بی جے پی دی انتہا پسندانہ اتے فتنہ پرور سوچ دا ھک ٻیا ثبوت اے ۔ مریم اورنگزیب آکھیے جو عالمی برادری بین المذاہب ہم آہنگی تے مقدس ہستیاں دے احترام دی عالمی تحریک دے منافی بھارتی حکومت دے رویں تے اقدامات دا نوٹس گھنے۔ انہاں آکھیے بھارت اقلیتاں خاص طور تے مسلماناں دے بنیادی حقوق، مذہبی آزادیاں اتے بنیادی انسانی حقوق دا مجرم اے، اینکوں کچاری اچ گھن آیا ونڄے ۔ وفاقی وزیر اطلاعات آکھیے جو ہر مسلمان اپݨے آقا کریمﷺ دی عزت وحرمت کوں آپݨی جان توں ودھ عزیز سمجھدے تے ایں مقصد کیتے کٹ مرݨ کوں تیار اے ۔
