اسلام آباد۔7جون (اے پی پی):صدر مملکت ڈاکٹر عارف علوی آئین دے آرٹیکل 156۔ون دے تحت قومی اقتصادی کونسل دی نویں سروں تشکیل دی مںظوری ݙے ݙتی ۔ ایوان صدر دے پریس ونگ توں منڳل کوں جاری بیان موجب وزیراعظم قومی اقتصادی کونسل دے چیئرمین اتے چارے صوبیں دے وزراء اعلیٰ کونسل دے ممبر ہوسن ۔ وفاق توں وزیر منصوبہ بندی احسن اقبال، وزیر خزانہ مفتاح اسماعیل، وزیر تجارت سید نوید قمر اتے وزیر مواصلات اسعد محمود اقتصادی کونسل دے ممبران تعینات کرݙتے ڳئن جݙاں جو پنجاب توں سردار اویس احمد خان لغاری تے سندھ توں سینیٹر نثار احمد کھوڑو دے ناں بطور ممبر قومی اقتصادی کونسل منظور کیتے ڳئن ، خیبر پختونخوا توں وزیر خزانہ تیمور سلیم جھگڑا تے بلوچستان توں سینئر وزیر خزانہ نور محمد دمڑ بطور ممبر تعینات کیتے ڳئن ۔ ڈپٹی چیئرمین پلاننگ کمیشن، سیکرٹری خزانہ، سیکرٹری اقتصادی اُمور تے سیکرٹری منصوبہ بندی ڈویژن خصوصی دعوت تے قومی اقتصادی کونسل دے اجلاساں اچ شرکت کریسن۔ وزیراعظم سمری دے تحت قومی اقتصادی کونسل دی نویں سروں تشکیل دی درخواست کیتی ہئی ۔ صدر مملکت قومی اقتصادی کونسل دی نویں سروں تشکیل وزیراعظم دی ایڈوائس تے کیتی اے ۔
