اسلام آباد۔7جون (اے پی پی):وزیراعظم شہباز شریف خیبر پختونخوا توں دریافت تھیوݨ آلے گیس دے ذخیرے توں عام کوں گیس دی فراہمی دی منظوری ݙے ݙتی اے ۔وزیراعظم آفس توں جای بیان موجب وزیراعظم نال فوجی فائونڈیشن گروپ دے چئیرمین وقار احمد ملک اتے ماڑی پٹرولیم دے سربراہ فہیم حیدر منڳل کوں اتھاں ملاقات کیتی ۔ وزیر مملکت پٹرولیم سینیٹر ڈاکٹر مصدق ملک اتے سیکرٹری پٹرولیم وی ملاقات اچ موجود ہن ۔ وزیراعظم توانائی دی قلت تے قابو پاوݨ کیتے سابق قبائلی علاقیں توں دریافت شدہ گیس فوری طور تے عوام کوں ݙیوݨ دی منظوری ݙتی ۔ خیبرپختونخوا دے علاقے بنوں توں ݙاہ کھرب کیوبک فٹ گیس دے ذخیرے دریافت تھئے ہن۔ وزیراعظم اے ذخیرے عوام کوں گیس دی قلت توں نجات ݙیواوݨ کیتے استعمال اچ گھن آوݨ دی ہدایت کیتی ۔ وزیرِاعظم کوں شمالی وزیرستان، بنوں اچ نویں دریافت شدہ ذخیرے بارے وی بریفنگ ݙتی ڳئی ۔ وزیراعظم کوں گیس دے شعبے دی مجموعی صورتحال، طلب اتے رسد بارے ݙسایا ڳیا ۔وزیراعظم متعلقہ علاقیں دے عوام کوں وی دریافت شدہ گیس دے ثمرات ݙیوݨ تے علاقے دی ترقی، سماجی بہبود، تعلیم، صحت دے حوالے نال سفارشات پیش کرݨ دی وی ہدایت کیتی ۔ وزیراعظم ہدایت کیتی اے جو انہاں کوں ݙسایا ونڄے جوج جیڑھے علاقیں توں گیس نکلی اے اتھاں دے عوام تے ٻالاں کوں کیا ملسی ۔
