اسلام آباد۔8جون (اے پی پی) وفاقی وزیر اطلاعات تے نشریات مریم اورنگزیب ، پی ٹی وی فلم ڈویژن اتے پاک فلس پراجیکٹ دا افتتاح کر ݙتے۔ پاک فلکس پراجیکٹ اچ پی ٹی وی دے مواد کوں آن لائن کیتا ویسی۔ پی ٹی وی فلم ڈویژن دی افتتاحی تقریب توں خطاب کریندیں ہوئیں وفاقی وزیر اطلاعات آکھیا جو 2017ء اچ پی ٹی وی فلم ڈویژن تے کم شروع کیتا ہئی، 2018ء اچ کابینہ دی منظوری نال پاکستان دی پہلی فلم پالیسی شروع کیتی ہئی۔ انہاں آکھیا جو قیام پاکستان دے ستر سال پورے تھیوݨ تے جمال شاہ پاکستان دی پہلی کلچر پالیسی ٻݨائی ہئی۔ انہاں آکھیا جو پاکستان دی پچھتر سالہ تقریبات دے موقع تے اے پراجیکٹ اڄ توں شروع تھیندا پئے۔ وزارت اطلاعات اچ فلم ڈائریکٹوریٹ وی ٻݨایا ویندا پئے۔ بجٹ دے بعد وزیراعظم فلم اتے سیاحت تے کانفرنس سݙیندے پئن۔ انہاں آکھیا جو فلم سیاحت کوں ودھاوݨ دا اہم ذریعہ اے۔ ایں موقع تے سیکریٹری اطلاعات شاہیرہ شاہد، ایم ڈی پی ٹی وی، سینئر اداکار جمال شاہ، لیلیٰ زبیری اتے وزارت اطلاعات دے اعلیٰ حکام موجود ہن۔
