اسلام آباد۔14جون(اے پی پی)وزیر داخلہ رانا ثناء ﷲ آکھیے جو وفاقی کابینہ دی منظوری دے بعد سابق حکومت دا بند لفافہ معاہدہ کھول ݙتا ڳئے، مسٹر کلین اتے صادق و امین برطانیہ اچ ریکور تھیوݨ الے 50 ارب روپے قومی خزانے اچ جمع کراوݨ دی بجائے بحریہ ٹائون دے بقایا جات اچ ایڈجسٹ کرائن، ایندے بدلے بحریہ ٹائون ارباں روپے دی 458 کنال زمین القادر ٹرسٹ اتے بنی گالہ اچ 240 کنال فرح شہزادی کوں منتقل کیتی اے، بحریہ ٹائون نال معاہدے تے خاتون اول دے دستخط ہین، معاملے دی تحقیقات کیتے کابینہ دی سب کمیٹی ٻݨا ݙتی اے، کابینہ ڈسکہ الیکشن رپورٹ کوں گھڑی کہانی قرار ݙیندے ذمہ داراں دے خلاف کارروائی کلیتے الیکشن کمیشن نال رجوع کرݨ دی ہدایت کیتی اے، شہزاد اکبر سیکرٹ فنڈز توں اسیکیوٹرز کوں کروڑاں روپے ݙتن۔ وفاقی وزرا مریم اورنگزیب، اسد محمود، وزیر مملکت پیٹرولیم مصدق ملک اتے معاون خصوصی امور کشمیر قمر الزمان قائرہ نال وفاقی کابینہ اجلاس دے بعد میڈیا بریفنگ اچ وزیر داخلہ رانا ثناء ﷲ آکھیے جو وفاقی کابینہ 3 دسمبر 2019 دے وفاقی کابینہ دے اجلاس اچ بند لفافے آلے معاہدے دی منظوری ݙتی اے، معاملے دا جائزہ ڳھدے، برطانیہ توں ریکوری دی رقم ایسسٹس ریکوری یونٹ دے شہزاد اکبر حکومت کوں کیس اچ فریق ٻݨاوݨ اتے رقم پاکستان ڳھن آوݨ دی بجائے تریاکل ٻݨدے ہوئے اپݨے 5 کھرے کیتن اتے ݙونمبر دستاویز ٻݨا تے اے 50 ارب بحریہ ٹائون دے بقایا جات دی مد اچ ایڈجسٹ کرا ݙتن۔ وفاقی وزیر مواصلاتی امور مولانا اسد محمود آکھیے جو عمران خان دی اڄ اصلیت اتے کرپشن کھل ڳئی اے، وزارت مواصلات اچ وی بے ضابطگیاں ہین جیکوں تیکھے سامݨے ڳھن آسوں۔ وزیر مملکت پٹرولیم مصدق ملک آکھیےجو آئوٹ آف کورٹ سیٹلمنٹ پیسہ ڳھن تے سپریم کورٹ دے رجسٹرار دے اکائونٹ اچ جمع کرا ݙتا ڳئے اتے چوری لکاوݨ کیتے کابینہ دی منظور نال معاملہ دبا ݙتے، سوال اے جو شہزاد اکبر کیہڑے قانون دے تحت اے سمری کابینہ اچ ڳھن ڳین جیندا کتھائیں کوئی ریکارڈ کائںی، ایں سارے معاملے دے فرنٹ مین شہزاد اکبر ہن۔
