اسلام آباد۔16جون (اے پی پی) وفاقی وزیر اطلاعات و نشریات مریم اورنگزیب نال متحدہ عرب امارات دے سفیر حماد عبید ابراہیم الزابی ملاقات کیتی۔ ݙوہیں رہنماواں پاکستان تے یو اے ای وچال ݙو پاسے تعلقات ودھاوݨ تے سانجھی دلچسپی دے امور تے ڳالھ مہاڑ کیتی ، وفاقی وزیر اطلاعات مریم اورنگزیب پاکستانی عوام دی طرفوں متحدہ عرب امارات دے سابق صدر شیخ خلیفہ بن زید النہیان دے انتقال پرچاوݨی ݙیندے ہوئیں آکھیے جو شیخ خلیفہ مرحوم پاکستان دے یار ہن ، انہاں دی وفات ݙوہیں ملکاں کیتے وݙا ضیان اے ۔ وفاقی وزیر اطلاعات آکھیے جو یو اے ای دے نویں صدر شیخ محمد بن زید بن سلطان النہیان وژنری تے ترقی پسند لیڈر ہن۔ انہاں آکھیے جو وزیراعظم شہباز شریف تے صدر شیخ محمد بن زید آندیاں نسلاں دی ترقی و خوشحالی دا انقلابی وژن رکھیندن ۔ ݙوہیں قائدین ݙوہیں ملکاں وچال معاشی، تجارتی، سماجی سودھے سانجھی دلچسپی دے سارے شعبیں اچ تکڑے تعلقات اتے رابطے ودھاوݨ چاہندن ، انہاں آکھیے جو ساݙی ھکومت نویں فلم و کلچر پالیسی تے عمل شروع کیتے ۔ یو اے ای اے دے فلم سازاں تے سرمایہ کاراں کوں فلم تے ڈرامے دے شعبیں اچ سانجھے منصوبیں اچ سرمایہ کاری دی دعوت ݙیندن ۔ مریم اورنگزیب دوبئی ایکسپو دے کامیاب انعقاد تے یواے ای دی قیادت تے آرگنائزر کوں مبارخ ݙیندے ہوئیں آکھیے جو دوبئی نمائش توں مثبت تشخص کوں چاوݨ دے علاوہ معاشی موقع اچ ودھارا تے مختلف ملکاں دی ثقافت کوں ودھارا تھئے۔ وزیراعظم شہباز شریف دے وژن مطابق تجارت تے بزنس ٹو بزنس رابطے کوں مزید ودھاوݨ چاہندوں ۔ متحدہ عرب امارات دے سفیر مریم اورنگزیب کوں وزارت اطلاعات دا منصب سنبھالݨ تے مبارخ ݙیندے ہوئیں آکھیے جو ݙوہیں ملکاں دی قیادت دے وژن دے مطابق ݙوطرفہ تعلقات کوں مزید ودھاوݨ تے یقین رکھیندوں۔
