اسلام آباد۔17جون (اے پی پی) وفاقی وزیر صحت عبدالقادرپٹیل دورہ متحدہ عرب امارات دے دوران دبئی دے شاہی خاندان دے رکن شیخ حمد بن دلموک المختوم تے انہاں دے حیات بائیوٹیک گروپ دے عہدیداران نال ملاقاتاں کیتیاں ، جاری بیان موجب ملاقاتاں دے دوران متحدہ عرب امارات اچ پاکستان دے قونصل جنرل حسن افضل سپیشل سیکرٹری ہیلتھ افتخارِ شلوانی وی موجود ہن ، ایں موقع تے متحدہ عرب امارات حکومت دی مختلف ٹیماں وزیر صحت اتے وفد کوں بریفنگ ݙتی ۔ملاقاتاں اچ حیات بائیوٹیک گروپ دے نال مختلف شعبیں اچ تعاون تے ڳالھ مہاڑ کیتی ۔وفاقی وزیر عبدالقادر پٹیل کوں ݙسایا ڳیا جو متحدہ عرب امارات ،پاکستان اچ پلازما دی تیاری اتے افزائش دیاں سہولتاں دے قیام اچ دلچسپی رکھیندے جݙاں جو پاکستانی وفد ایں دلچسپی دی تعریف کیتی تے سانجھے تعاون دے نال اینکوں مزید اڳوں ودھاوݨ دی لوڑھ تے زور ݙتا ، ایں موقع تے انہاں کوں متحدہ عرب امارات اچ ڈیجیٹل تے میڈیکل سائنسز دے شعبے طبی پیشرفت بارے اچ وی ݙسایا ڳیا ۔عبدالقادرپٹیل آکھیے جو پاکستان تے متحدہ عرب امارات دے درمیان پراݨے تعلقات ہن ،ایں دورے توں ݙوہیں ملکاں وچال صحت دے شعبے اچ اہم تعاون دا آغاز تھئے ۔شاہی خاندان دے گروپ پاکستان اچ سرکاری ہسپتالاں دی اپ گریڈیشن اچ دلچسپی ظاہر کیتی ۔
