اسلام آباد۔23جون (اے پی پی) پاکستان ، افغانستان اچ زلزلہ دے متاثرین کیتے امدادی سامان بھیج ݙتے۔ دفتر خارجہ دے ترجمان ولوں خمیس کوں جاری بیان موجب وزیراعظم محمد شہباز شریف دی ہدایت تے پاکستان افغانستان دے زلزلہ متاثرین کیتے امدادی سامان بھیجے۔ ترجمان آپݨے بیان اچ ٻیا آکھیا جو نیشنل ڈیزاسٹر منیجمنٹ اتھارٹی ولوں کھیپ دا بندوبست کیتا ڳئے جئیں اچ فیملی ترپال، کمبل اتے ہنگامی دوائیں دا سامان شامل اے۔ پاکستان متاثرہ افغان ٹٻراں دی اوکھ کوں ڳھٹ کرݨ کیتے ہرممکن تعاون دا یقین ݙوائے۔
