اسلام آباد۔23جون(اے پی پی)وزیراعظم محمد شہباز شریف پہلے ریاست اتے ولا سیاست کوں اتحادی حکومت دی ترجیح قرار ݙیندے آکھیے آئی ایم ایف نال شرائط طے تھی ڳین، چین پاکستان کوں 2.3 ارب ڈالر ݙیندا پئے، موجودہ حکومت پٹرولیم مصنوعات دی قیمتاں مجبوراً ودھائن، پہلی واری تکڑے لوکاں تے ٹیکس لگدا پئے، لوڈ شیڈنگ تے قابو پا ڳھنسوں اتے پاکستان ولا تکڑا تھی ویسی۔ اے ڳالھ انہاں مسلم لیگ (ن) دے سینیٹرز نال خطاب کریندے آکھی۔ انہاں آکھیا جو اڳیں حکومت آئی ایم ایف نال معاہدے کیتن بھل نبھائے نئیں، تہوں ساکوں پٹرول دیاں قیمتاں ودھاوݨیاں پن، پی ٹی آئی حکومت ویندے ہوئے ساݙے کیتے وݙا معاشی اوکھ چھوڑ ڳئی اے، انہاں نا تیل دی مد اچ کوئی رقم رکھی نا ایندی کابینہ توں منظوری ڳھدی۔ انہاں آکھیا جو پچھلی حکومت اپݨے دور اچ ہک ٹکے دا سوکھ نئیں ݙتا، ساݙے نال دے ملک ساݙے کولو کتنا اڳو تے نکل ڳین ٻھل اساں پچھو رہ ڳئے ہیں، چین ساکوں 2.3 ارب ڈالر ݙیوݨ دا وعدہ کیتے بھل ساکوں اپݨی اصلاح کرݨی اے، اپݨے قدرتی وسائل تے توجہ ݙیوݨی ہوسی، اساکوں فیصلہ کرݨا ہوسی جو اساں تریخ دا رخ موڑنے۔
