اسلام آباد۔24جون(اے پی پی)وزیر خزانہ و ریونیو مفتاح اسماعیل آکھیے جو حکومت اوکھے فیصلاں نال ملک کوں ݙیوالہ تھیوݨ توں بچائے، ایں سال پرائمری خسارہ 1600 ارب روپے آئے آندے سال ایکوں 153 ارب روپے وادھو کیتا ویسی، مجموعی بجٹ خسارہ وی ڳھٹ کیتا ویسی، 15 کروڑ توں ودھ آمدنی آلیاں کمپنیاں تے ہک فیصد، 20 کروڑ روپے توں ودھ آمدنی آلی کمپنیاں کوں ݙو فیصد، 25 کروڑ روپے توں ودھ آلیاں کمپنیاں تے 3 فیصد اتے 30 کروڑ توں ودھ آمدنی آلیاں کمپنیاں تے 10 فیصد سپر ٹیکس لڳسی، ٹیکساں دے اہداف ودھا ݙتے ڳین، ہݨ 7004 دی بجائے ٹیکساں دا ہدف 7470 روپے ہوسی، نان ٹیکس ریونیو کوں 2 ہزار ارب روپے توں گھٹا تے 1935 ارب کرݙتے، صوبیاں کوں 4373 ارب روپے ݙیسوں، انہاں سارے اخراجات دے بعد 4547 ارب روپے دا خسارہ تھیسی، 300 مربع فٹ جیولرز دی دکان تے 40 ہزار روپے دا فکس ٹیکس لائے، وݙیاں دکاناں تے 17 فیصد دی بجائے 3 فیصد جنرل سیلز ٹیکس لڳسی، اے ڳالھ انہاں نویں مالی سال 23۔2022 دے وفاقی بجٹ تے عام بحث مکاوݨ ویلھے آکھی۔ انہاں آکھیا جو کپاۃ اتے کݨک سودھا زرعی خودکفالت کیتے کاٹن سیڈ اتے بنولا تے ٹیکس ہٹا ݙتا ڳئے، ایں توں ودھ کسان دوست بجٹ پچھلے ݙو ڈھاکیاں توں نئیں آیا، زراعت تے خرچ تھیوݨ آلا پیسہ سبسڈی نئیں سرمایہ کاری کیتے لڳدا پئے، میں خشوخبری ݙینداں جو انشاء اللہ 23 کروڑ عوام دا ملک ڈیفالٹ نئیں ترقی دو پندھ کریسی۔
