اسلام آباد۔27جون (اے پی پی):وزیراعظم شہبازشریف اسلام آباد جیل کمپلیکس دے منصوبےاچ سالاں دی تاخیر دانوٹس گھندے ہوئیں اڳلے مالی سال اچ جیل دی تعمیر مکمل کرݨ دی ہدایت کیتی اے تے منصوبے دے جائزے کیتے 6 رکنی کمیٹی بݨا ݙتی اے ،وزیراعظم آفس دے میڈیاونگ توں جاری بیان موجب وزیر داخلہ رانا ثنااللہ خاں کوں کمیٹی دا سربراہ مقرر کیتا ڳئے ، وزیراعظم دے سیکرٹری ڈاکٹر توقیر شاہ ایں حوالے نال حکمانہ جاری کرݙتے۔کمیٹی دے ارکان اچ داخلہ، ہاؤسنگ، منصوبہ بندی دیاں وزارتاں دے سیکرٹری، چیف کمشنر اسلام آباد تے چیئرمین سی ڈی اے شامل ہن ۔وزیراعظم معاملے تے کمیٹی توں ھک ہفتے اچ رپورٹ منڳدے ہوئیں اسلام آباد ماڈل جیل کمپلیکس دا کئی سالاں توں زیر التوا منصوبہ ہنگامی بنیاداں تے مکمل کرݨ دی ہدایت کیتی اے ۔ جدید ترین عالمی معیار تے سہولتاں دی حامل اسلام آباد جیل دی تعمیر فنڈز نہ ہووݨ پاروں مکمل نہ تھی سڳی ۔وزیراعظم ہدایت کیتی اے جو اڳلے مالی سال اچ منصوبے کوں مکمل کیتا ونڄے ۔ واضح رہے جو اسلام آباد جیل کمپلیکس کوں دنیا دیاں جدید جیلاں دی طرز تے بݨایا ویندا پئے ۔اسلام آباد دی اپݨی جیل نہ ہووݨ دی وجہ توں قیدیاں کوں گزریل 6 ݙھاکیں توں اڈیالہ جیل اچ رکھیا ویندا پئے ۔اسلام آباد اچ موٹروے دے نیڑے سیکٹر ایچ 16 اچ 90 ایکڑ تے محیط اے جدید جیل تعمیر تھیندی پئی اے۔ ݙو منزلہ بیرکاں آلی جیل اچ 2 ہزار قیدیاں کوں رکھیا ویسی ۔ سکول، مسیت، ٹریننگ سینٹر، کھیݙ دے میدان، آئی سی ٹی دیاں عدالتاں وی ایں جیل کمپلیکس دا حصہ ہن۔ جیل حکام دی تربیت دا مرکز وی منصوبے دا حصہ اے۔
