ریاض۔29جون (اے پی پی):سعودی عرب دے فرمانروا تے خادم الحرمین الشریفین شاہ سلمان بن عبدالعزیز سارے متعلقہ اداریں کوں ہدایت کیتی جو او عازمین حج دی ہر ممکن خدمت کرن تے انہاں کوں درکار ہرسہولت ݙیوݨ دی بھرپور کوشش کیتی ونڄے ۔ سعودی خبر رساں ادارے موجب اے ڳالھ اناہں گزریل ݙینھ آپݨی زیر صدارت جدہ دے قصرالاسلام اچ تھیوݨ آلے کابینہ اجلاس اچ آکھی اے ۔ شاہ سلمان آکھیے پوری دنیا توں حج تے عمرہ زائرین خانہ کعبہ اتے مسیت نبوی دا رخ کریندن ، سعودی عرب زائرین دی نگہداشت، سرپرستی تے آرام و راحت دا خیال ریاست دے قیام دے پہلے ݙینھ توں کیتا تے اڳوں وی کریندا رہ ویسی ، انہاں دا آکھݨ ہئی جو الحرمین الشریفین تے انہاں دے زائرین دی اعلی ٰاستعداد دے نال خدمت جاری رکھݨ ساݙا فخر اے تے رہسی ۔شاہ سلمان حج خدمات تے مامور سارے ریاستی اداریں کوں ہدایت کیتی جو او ایں عظیم اعزاز دا حق احسن طریقے نال نبھاون ۔ کابینہ دے اجلاس اچ عراقی وزیراعظم دا دورہ سعودی عرب تے ولی عہد شہزادہ محمد بن سلمان نال انہاں دے مذاکرات دے موضوع تے وی بحث کیتی ڳئی ۔سعودی کابینہ بحرین نال سیاسی رابطہ کمیٹی دے پہلے مشاورتی اجلاس دے نتجے، اٹلی نال مشترکہ کمیشن دے اجلاس دے امور تے وی رپورٹ پیش کیتی ڳئی ۔
