اسلام آباد۔29جون (اے پی پی):وفاقی وزیر اطلاعات و نشریات مریم اورنگزیب منڳل تے ٻدھ دی وچلی رات قومی خبر رساں ادارے (اے پی پی) دےملازمین دے شاہراہ دستور تے جاری احتجاجی مظاہرے اچ پڄ ڳن ۔ انہاں ملازمین دے مطالبات حل کرݨ دا یقین ݙیوایا جیں توں بعد مظاہرین آپݨا احتجاج ختم کر ݙتا۔ وفاقی وزیر اطلاعات و نشریات مریم اورنگزیب ٻدھ دی رات شاہراہ دستور تے ایسوسی ایٹڈ پریس آف پاکستان (اے پی پی ) دے احتجاج کرݨ آلے ملازمین نال ملاقات کیتے پڄیاں ۔ ایم ڈی اے پی پی اختر منیر، پرنسپل انفارمیشن آفیسر (پی آئی او ) مبشر حسن وی انہاں دے رلے ہن ۔ وفاقی وزیر اطلاعات یک جہتی کیتے مظاہرین نال سڑک تے ٻہہ ڳئن ۔ انہاں آکھیے صحافیاں دے نال انہاں دا تعلق سیاسی یا حکومتی نمائندے دے طور تے کائنی ۔ میکوں اے پی پی دے ملازمین دے مسئلیں دا پورا پتہ اے لیکن اے مسئلہ صرف اے پی پی دا کائنی ۔ انہاں آکھیے پورا ݙینھ وزارت اطلاعات دے اعلیٰ حکام وزارت خزانہ نال رابطے اچ رہیے ۔ ’’ڈسپریٹی الائونس‘‘تے ’’ریگولر پے سکیلز‘‘ساری کارپوریشنز دا مسئلہ اے۔ وزارت خزانہ دے حکام کوں آکھیے جو ایں مسئلے دا وختی حل کڈھو ، ایں ضمن اچ ھک کمیٹی بݨا ݙتی ڳئی جیڑھی جو اڄ ٻدھ کوں ایں معاملے دا جائزہ گھنسی۔ انہاں اے پی پی ایمپلائز یونین دے نمائندیں کوں آکھیے جو او وی کمیٹی دے اجلاس اچ شرکت کرن ۔ وفاقی وزیر اطلاعات مریم اورنگزیب یقین ݙیوائے جو اے پی پی ملازمین دیاں ترقیاں کیتے ’’ڈی پی سی‘‘ کراوݨ دی ہدایت جاری کیتی ویسی ۔ اے پی پی ملازمین وزیر اطلاعات مریم اورنگزیب دی آمد،یک جہتی دے اظہار تے مسئلیں کوں حل کرݨ دا یقین ݙیواوݨ تے شکریہ ادا کیتا تے آپݨا احتجاج ختم کرݙتا۔
