کوئٹہ۔1جولائی (اے پی پی):وفاقی وزیر تخفیف غربت و سماجی تحفظ شازیہ مری آکھیے جو بلوچستان دیاں تریمتاں کوں سماجی تحفظ ݙیوݨ دے نال انہاں کوں معاشی طور تے مضبوط کریسوں تاں جو او پاکستان دی ترقی اچ آپݨا کردارنبھا سڳن ، اڳلے مہینے توں بلوچستان دے ہر ضلع اچ بےنظیر انکم سپورٹ دے نشوونما پروگرام دے سنٹرز کھول ݙتے ویسن،بلوچستان دے مختلف علاقیں اچ 25 موبائل گاݙیاں ݙتیاں ویسن ، بی آئی ایس پی دے بے نظیر تعلیم پروگرام توں ڈھائی کروڑ ٻال فیدہ چیندے پئن ، وزارت تخفیف غربت وسماجی تحفظ دے منصوبیں اچ بلوچستان کوں پہلی ترجیح اچ رکھیا ویسی۔اے ڳالھ انہاں کوئٹہ دے مقامی ہوٹل اچ پاکستان پاورٹی ایلویشن فنڈ دی سانجھ توں بلوچستان دے مختلف علاقیں دیاں تریمتاں اچ بلاسود قرضہ جات دے چیک ونڈݨ دی تقریب توں خطاب کریندے ہوئیں آکھی ، ایں موقع تے پی پی اے ایف دے چیف ایگزیکٹیو آفیسر نادر گل بڑیچ ،رکن قومی اسمبلی روبینہ عرفان، سابق ارکان اسمبلی راحیلہ حمید خان درانی، غزالہ گولہ، روشن خورشید بروچہ تے ٻئے موجود ہن۔
