اسلام آباد۔1جولائی (اے پی پی)وفاقی وزیر منصوبہ بندی و ترقی پروفیسر احسن اقبال آکھیے جو ملک کوں خوردنی تیل اچ خودکفیل بݨاوݨ ترقیاتی ایجنڈے دی ترجیح اے، ایں ویلھے ملک اچ خوردنی تیل دی طلب 4.517ملین ٹن اے، خوردنی تیل اچ خودکفالت دے پلان تے سارے صوبیں دے سٹیک ہولڈرز کوں اعتماد اچ گھن تے ھک ہفتے اندر روڈ میپ تشکیل ݙیون ۔ اے ڳالھ انہاں جمعے کوں خوردنی تیل اچ کفالت حاصل کرݨِ دے حوالے نال بݨائے ونڄݨ آلے پلانز دے جائزہ اجلاس دی صدارت کریندے ہوئیں آکھی ۔ اجلاس اچ نیشنل فوڈ سیکورٹی تے وزارت منصوبہ بندی و ترقی دے حکام شرکت کیتی۔ وفاقی وزیر منصوبہ بندی آکھیے ملک کوں خوردنی تیل اچ خودکفیل بݨاوݨ ترقیاتی ایجنڈے دی ترجیح اے ، نیشنل فوڈ سیکورٹی دے افسران بریفنگ اچ ݙسائے جو ایں ویلھے ملک اچ خوردنی تیل دی طلب 4.517ملین ٹن اے جݙاں جو طلب دا 8 فیصد ملکی پیداوار توں پورا تھیندا پئے ، ملک اچ 92 فیصد خوردنی تیل 4.5 بلین ڈالر دا درآمد تھیندا پئے ۔ بریفنگ وچ ݙسایا ڳئے جو خوردنی تیل دی پیداوار پہلے سال 0.745ملین ، 5 سال اچ 1.192 تے 10 سال بعد 4.793 ملین ٹن تئیں گھن ونڄݨ دی تجویز کیتی اے ۔ وفاقی وزیر احسن اقبال آکھیے خوردنی تیل اچ خود کفالت حاصل کرݨ کیتے پرائیوایٹ سیکٹر کوں زیادہ توں زیادہ متحرک کیتا ونڄے ، عوام کوں خوردنی تیل دی فراہمی کوں حفظان صحت دے اصولاں دےمطابق یقینی بݨایا ونڄے۔
