فیصل آباد۔4جولائی (اے پی پی):وزیراعلیٰ پنجاب حمزہ شہباز فیصل آباد انسٹی ٹیوٹ آف کارڈیالوجی اچ دوا گھنݨ کیتے آوݨ آلی تریمت نال زیادتی دے واقعہ دا نوٹس گھندے ہوئیں آئی جی پولیس پنجاب راؤ سردار علی خان توں رپورٹ منگ ڳھدی اے جݙاں جو فیصل آباد پولیس نامزد ملزم کوں گرفتار کرڳھدے ۔ تفصیل موجب فیصل آباد انسٹیٹیوٹ آف کارڈیالوجی (ایف آئی سی) دے گارڈ بابر، منیر آباد دے رہݨ آلی سلمیٰ ناں دی تریمت دی عصمت دری کیتی تے کہیں کوں ݙساوݨ دی صورت اچ جان توں مارݨ دیاں تڑیاں ݙتن، پولیس تھاݨہ سول لائن فیصل آباد اچ مدعیہ سلمیٰ بی بی دی طرفوں درج کرائی ونڄݨ آلی ایف آئی آر موجب گزریل مہینے 6 جون کوں فیصل آباد انسٹیٹیوٹ آف کارڈیالوجی (ایف آئی سی) دے گارڈ بابر ساکن 65 گ ب اینکوں ڈاکٹر توں چیک اپ کراوݨ تے دوائیں ݙیواوݨ دے بہانے سݙ تے جنسی زیادتی دا نشانہ بݨایا۔ وزیر اعلیٰ پنجاب حمزہ شہباز شریف تریمت نال زیادتی دے واقعہ دا نوٹس گھن تے انسپکٹر جنرل پولیس توں رپورٹ منگ ڳھدی۔وزیر اعلیٰ ہدایات جاری کریندے ہوئیں آکھیے جو ملزمان دے خلاف قانون دے مطابق سخت کارروائی تے متاثرہ تریمت کوں انصاف ݙتا ونڄے ، انہاں آکھیے واقعہ دی ہر پہلو توں تحقیقات کیتی ونڄے تے اصل حقائق ڄاݨیے ونڄن۔سٹی پولیس آفیسر سید علی ناصر نقوی ملزم دی گرفتار دے احکامات جاری کیتے جیں تے ایس ایچ او سول لائن کارروائی کرتے ملزم بابر کوں گرفتار کرڳھدے جیں دے خلاف مقدمہ درج کرتے قانونی کارروائی شروع کرݙتی ڳئی اے۔
